Ha masunod nga tulo ka semana, igpapatuman an disinfectation ha bug-os nga syudad han Tacloban komo usa han mga pitad ha pag-ato kontra han COVID-19.
An grupo han mga negosyante nga Philippine Chamber of Commerce and Industry-Tacloban ha pakipagsumpayan han City Government, Bureau of Fire Protection, ngan mga volunteer Fire Brigades an nagtikang han ira pag-spray han tubig nga mayda sakot nga kemikal nga makakamatay han kagaw. Sumala pa han report, kada adlaw ini pagbubuhaton tobtob hiton Abril 12 nga amo an igintalaan nga petsa nga matatapos an community quarantine.
Gintikangan an aktibidad kakulop, Marso 21, ngan syahan nga ginhimo an disinfectation ha mga kakalsadahan ha downtown area ngan ha iba pa nga dagko nga kalsada. Susundan pa ini han mga agi-anan ngadto han magkalainlain nga mga barangay. Magbalik-balik ini nga buruhaton sulod hin tulo ka semana.
Labot la han kakalsadahan, ginpasiritan gihapon han disinfectant an mga pampubliko nga lugar han syudad sugad han mga plaza.
Yana naman nga adlaw, Marso 22, temporaryo nga sasadhan an merkado publiko han syudad para gihapon han sanitation activity. Tikang alas 12:01 han kulop tobtob han gab-i waray la anay panmaligya ha merkado tungod hini nga paglimpyo. Aabrihan utro an merkado para han mga negosyante ngan manmaralit dida hiton maagahon hiton Lunes, Marso 23. #
