Isumat.com/1:39PM, Enero 22, 2021
Deri sadang ikabaraka han nagdudumara, magturutdo ngan mga estudyante han University of the Philippines kun sumulod an militar ngan kapulisan ha mga campus han unibersidad.
Hi MajGen Pio Dionisio, nangungulo han kanan Philippine Army 8th Infantry Division ha Eastern Visayas in nagpatapod nga waray matatabo nga panarhog, pag-abusar ngan harassment kontra han mga taga UP kun masulod ha eskwelahan an mga tropa han gobyerno. Ini an nagin paagpasarig han heneral dida han interview ha iya han iFM-RMN Tacloban yana nga adlaw, Enero 22, 2020.
Kun manunumduman, nagpabati hin pagtipa ngan pagsuson an komunidad han UP han igbasura han Department of National Defense an kasabutan han UP ngan Defense Department nga makakasulod la an militar ngan pulis ha unibersidad kun may permiso tikang han nagdudumara han eskwelahan.
Ini nga UP-DND Accord in nahimugso hadton 1989 han sikmiton han militar in usa nga estudyante han UP ha sulod mismo han campus ha UP-Diliman. Ini nga estudyante in iginlambing hin pagpatay hin US Military Official hadto. Igindig-on han estudyante nga waray hiya kalabutan han krimen ngan gin-torture hiya han militar.
Nagpahayag hi Dinoso nga ira ginrerespeto an freeedom of speech, freedom of expression ngan human rights han mga taga UP labi na an mga estudyante. Waray plano an AFP nga ini nga mga katungod in pag-utdon kay amo ini an pagpamatood nga mayda demokrasya han nasud.
Ginklaro han heneral nga an ira babalabgan amo an panhugay ngan pan-recruit han CPP-NPA ha mga estudyante nga umapi han terorista nga kagi-usan.
Ginhihingyap han militar nga makagtapos pag-eskwela an mga estudyante ngan deri mahingadto han baliko nga dalan, sering pa ni Dinoso.
Iginpasarig pa han opisyal nga deri hira makontra han mga rally ngan demonstrasyon han mga taga UP kay ira ini katungod. An susupilon han AFP ngan PNP amo an pan-recruit ngan pag-gamit hin armas nga may panuyo nga tumbahon an gobyerno.
An mandato han militar amo an pagmintenar han kamurayawan ngan pagpoypoy han kasamok ngan deri pagsalikway han academic freedom, pahayag pa ni Dinoso.
Kasumpay hini, dako an pagtoo han heneral nga 99.9 % han UP an deri nasuporta han mga NPA nga kumunista. Nag-esplikar hi Dinoso nga pipira-pira la ini nga kaapi han walhon nga grupo nga amo an nanre-recruit ug ini an ira babalabgan. #
