Isumat.com/12:23PM, August 21, 2020
An mga bungto ngan syudad nga damo na an infection han Covid-19 in kinahanglan mag-implementar han “Lockdown” ngan deri an syudad han Tacloban pahayag ni City Mayor Alfred Romualdez.
Dida han interview ha iFM-RMN Tacloban, naghangyo hi Romualdez ngadto han mga lideres han LGUs nga may natatabo nga local ngan community transmission nga ig-lockdown an ira tagsatagsa nga lugar. Sumala ha iya, kinahanglan magin istrikto gud an pagbantay han mga LGUs han gi-os han ira mga mulopyo.
Gin-esplikar han alkalde nga damo an katawhan tikang ha iba nga bungto nga nasulod ngan nagawas ha Tacloban kada adlaw tungod han ira trabaho ngan pagpakabuhi. Waray kontrol an gobyerno han Tacloban sanglit an angay magbantay hini an mga LGUs kun diin nag-uukoy ini nga mga tawo.
Kasumpay hini, igmamando ni Romualdez ha Tacloban City Health Office nga magpadangat hin komunikasyon ha Department of Health basi an DOH na mismo an magrekomendar ha natutungdan nga mga LGUs nga magpatuman hin lockdown.
Igindig-on ni Romualdez nga makuri hin duro kun an Tacloban an igpailarum hin lockdown kay dako an epekto hini ha bug-os nga rehiyon tungod kay sentro ini han mga opisina han gobyerno, negosyo ngan ekonomiya. An airport ngan dagko nga mga bangko in aadi gihapon ha Tacloban, sanglit deri maupay kun mag lockdown an syudad.
Hapagkayana, bisan kun nagpapadayon an paghitaas han Local Transmission ha Tacloban, iginpapatuman la an Zonal Containment basi kalikayan an pagsarang han virus.
Ha kasumpay nga notisya, nagdeklarar na an LGU-Catbalogan City nga tinikangan yana nga adlaw, igbabalik an Enhanced Community Quarantine didto han syudad. Ini in katapos la magsapin-sapin an nagkatatapnan nga health workers sugad man katawhan nga waray travel history. Natapnan na gihapon an ira Mayor nga hi Dexter Uy.
Ha bungto naman han Inopacan, Leyte nagmando an LGU nga an hin-o man nga tawo nga tikang ha mga bungto o syudad denhi ha Region 8 nga mayda Community Transmission in kinahanglan magkaada hin duha ka semana nga kwarentina kun mapakadto o mabalik ha ira bungto. #
