Isumat.com/9:25AM, August 21, 2020
Waray la anay operasyon an 578 Emporium ha Borongan City, Eastern Samar ha masunod nga pira ka adlaw, sumala han Human Resource Department han nasabi nga establisemento.
An Contact Tracing Team han Borongan in pumakadto kakulop han tindahan ngan ginsagdunan nga igpasara la anay an establisemento ngan mag kwarentina an mga empleyado nga nakadto han tindahan hadton Agosto 13. Dida hini nga adlaw, an nag positibo han virus nga taga Borongan in pumakadto ha 578-Borongan.
Sumala han tagdumara han kompaniya, an 60 nga mga empleyado han tindahan in aada na yana ha “Strict Home Isolation” subay han kamanduan han LGU-Borongan. An ira kwarentina in tobtob hiton Agosto 27. Ginkuhaan gihapon hin swab samples an pira nga empleyado han 578.
Kun mag negatibo an mga resulta han Confirmatory Testing, mabalik an operasyon han tindahan hiton Agosto 28, pahayag pa han tagdumara han 578.
Ginklaro gihapon han establisemento nga an 578-Borongan la an apektado hini. Pinanhimuwa gihapon nira nga an 578-Tacloban an gintutudlok nga tindahan. An 578-Tacloban in aada ha normal nga operasyon.
Iginpatapod han 578 Emporium nga ginseseguro nira nga talwas han virus an napulo nga ira mga tindahan denhi ha Rehiyon Otso. #
