Isumat.com/9:10AM, August 21, 2020
Nagdurot hin pagkabaraka ha kadam-an nga mulopyo ha Abuyog, Leyte an iginlabog nga mga basura nga ginlalakipan hin gingamit na nga mga Rapid Testing Kits.
Natad-an an nasabi nga basura ha ligid han kalsada ha Sitio Tag-abaca, Brgy Balinsasayao ha Abuyog. Iginreport ini han mga residente ngadto han LGU. Kadagmitan naman nga nagpadara hin mga personales an LGU basi magdumara hin inspection.
Dida han ira panginano, nakatara hira hin mga karton kun diin an sulod hini an mga gingamit na nga Rapid Test Kits. Igindig-on han LGU nga delikado ini hin duro ngan makakaghatag hin infection han makakakapot.
Sumala pa kan Mayor Lemuel Gin Traya kinahanglan magin responsable an ngatanan ha paghapil han basura basi kalikyan an pagsarang hin makatarapon nga mga sakit. Kasumpay hini, gin-aghat ni Traya an publiko nga magin mabinantayanon ngan igsumat dayon ha mga otoridad an sugad hini nga mga insidente.
An LGU in nagdudumara na yana hin imbestigasyon para masabtan an mga tawo nga nagpapaluyo hini nga panhitabo ngan sampaan han kaangayan nga kaso. #
