Isumat.com/9:51AM, December 17, 2020
Usa nga mahinungdanon nga proyekto ha pagpa-upay han kalibungan ngan natural nga karikuhan an iginmugna han Leyte Normal University (LNU) ngan ini an pinaagi han Mangonbangon River Park.
Kakulop, Disyembre 16, nagkaada hin inagurasyon ngan blessing han nasabi nga proyekto ha panguna ni LNU President Dr. Jude Duarte. Tinambungan gihapon ini han mga tinaglawas tikang ha DENR, City Government han Tacloban, Department of Tourism ngan mga opisyales ngan personales han unibersidad.
An nasabi nga aktibidad in kaparte han paglansad han LNU han mga buruhaton kasumpay han pagtigaman han 100 ka tuig tikang matindog an eskwelahan. An Mangonbangon River Park in namumutang sapit han tulay ha eskina han Paterno ngan Ninoy Aquino Avenue, tikadto dapit ha Brgy-50-A, Youngfield. Aada ha ligid han Park an salog han Mangonbangon nga natahos ha magkalainlain nga barangay han syudad.
Sumala han impormasyon tikang ha LNU, hadto pa han 2017 nahimugso an ideya nga maghimo hini nga park dida han hiruhimangraw nira Duarte, pira nga opisyal ngan inhenyero han LNU. Nagtikang an proyekto hadton Enero 2020 ngan dida han inagurasyon, igindungan ini han katapos han Phase 1 nga nagkakantidad hin Dos Milyones Pesos.
Ginbutangan hin sementado ngan may dekorasyon nga lamesa ngan lingkuranan an lugar ngan naklaro na yana an mga kakahuyan kay nalimpyuhan an lugar nga hadto higtaas an kabanwaan ngan labugan hin basura. Magkakamay-ada pa ini hin Phase 2 kun diin bubutangon hin tulay tikang han Park derekta ha campus han LNU. Labot la hini, aadornohan hin Mural Painting an pader han LNU nga naatubang han salog ngan Park.
Dida han iya pamulong, nagsering hi Duarte nga ini nga Park in kaparte han panlimbasog han LNU nga malimpyuhan ngan magkaada hin rehabilitasyon an naghihimaroydoy ngan nadudunot nga salog. Iginpatapod han opisyal nga magtutudlok hira hin mga personales ngan mga estudyante nga regular maglilimpyo han salog ngan parke.
Igindugang pa ni Duarte nga an unibersidad in maghihimo hin kalugaringon nga Waste Management System basi deri mahingadto ha salog an hugaw o baya tikang ha LNU nga puede magdurot hin polusyon.
Kasumpay hini, mahugot an panawagan ni Duarte ha kapitan han Brgy 50-A nga bumulig pagmentenar han kalimpyo han salog ngan parke. Nagpahayag an LNU President nga makikigsumpayan pa hiya ha iba nga barangay nga inaagi-an han salog nga makig-urusa han ira paningkamot nga marehabilitar an Mangonbangon River.
An nasabi nga proyekto in nahimugso pinaagi gihapon han kooperasyon han Environmental Management Bureau han DENR, Tacloban City Government ngan Brgy. 50-A. #
