Isumat.com/9:30AM,June 28, 2020
Ha panahon han krisis durot han COVID-19 Pandemic, nagsapin-sapin na an mga obligasyon han kapulisan. Labot la han pagmentenar han kamurayawan ngan pagbantay kontra han insurhensiya, hira gihapon an nagdumara hn mga checkpoints ngan pagpatrolya basi maseguro nga ginsusunod han katawhan an health protocols.
Didto ha Eastern Samar, an Provincial Command han PNP ha ilarum han liderato ni PCol. Carlito Abriz in naglunsad han programa nga “Kapwa Ko, Sagot Ko.” Ha ilarum hini nga programa, an mga kablasanon nga pamilya ha mga burubungto an ginbuligan pagtindog hin balay labot la han paghatag hin hinabang nga salapi, tunga hin sako nga bugas ngan dressed chicken.
Ini nga ira aktibidad in gintikangan katapos gud la han bagyo Ambo kun diin damo nga pamilya an nagub-an hin balay ha pira nga bungto han Eastern Samar ug an iba naman nawarayan pakabuhi dara han lockdown.
An grupo nga nagbaton han derektiba ni Abriz in ginkokomponer nira LtCol Sulpecio japagat Jr, hepe han Community Affairs Unit, Maj Alex Robin, Maj Rommel Cecista, ug kadam-an nga mga personales han PNP-Eastern Samar.
Nakagtindog hira hin kabablayan ha mga munisipalidad han Dolores, Maslog, Balangkayan, Mercedes, Quinapondan, Giporlos, Gen MacArthur ngan iba pa nga lugar.
Kinasingkasing ngan tim-os nga pagpasalamat an iginpabati han mga nakatagamtam hini nga ayuda han kapulisan. # (KEVIN SIOSANA with report and photos by ESPPO)
