Isumat.com/4:55PM, June 11, 2020
Temporaryo nga deri igpapadayon an Balik-Probinsya Program han gobyerno. Pira pala ka oras an nakalabay, hi NHA General Manager Marcelino Escalada nga amo an Executive Director han programa an nagpasamwak nga suspendido an aktibidadis hini nga proyekto.
An mao nga programa in makusog nga iginduso ni Senador Bong Go nga may panuyo nga ma-ibanan an naghuhuro-ot nga katawhan ha Metro Manila. Pero ini in naka-alarma ngan nakabaraka ha mga LGUs tungod han paturapak ngan waray koordinasyon han mga ahensya nga nadadabi, hinungdan nga may mga katawhan nga nakagdara han corona virus ngadto han ira tagsatagsa nga lugar.
Pero ginklaro ni Escalada nga temporaryo la ini samtang ginpaplantsa pa an mga patakaran basi magin matulanoy na an programa ha utro hini nga pag-arangkada. Nagsering an opisyal nga porlomenos usa la ka bulan an suspension han Balik Probinsya ngan igpapadayon ini hiton Hulyo.
Hapagkayana, an gobyerno an matutok ha mga na-stranded nga mga residente han mga probinsya ug an mga OFWs basi maka-uli na hira ha ira tagsatagsa nga lugar. Ini nga aktibidad amo an tinatawag nga Hatid Probinsya, sering ni Escalada.
Dara hini, an nakatalaan nga pagbyahe han 2nd batch yana nga adlaw, Hunyo 11, in waray madayon. An makakabiyahe lugod an mga na-stranded ngan mga OFWs.
Ginklaro han opisyal nga an Balik Probinsya in para han mga maiha na nga nag-iinukoy ha Manila ngan karuyag bumalik ha ira probinsya, samtang an Hatid Probinsya in para han mga na-stranded ngan OFWs.
Kasumpay hini, hi Biliran Governor Rogelio Espina in nagpasalamat han nagin desisyon han National Government pagsuspender han programa.
Nagsering hi Espina nga an dapat himoon an pagkaada hin hingpit nga koordinasyon ha mga LGUs basi kalikyan an pagsarang han kagaw. # (KEVIN SIOSANA)
