Isumat.com/8:41AM, November 20, 2020
“Katapos han temporaryo nga himaya, waray hugpoy nga perwisyo ngan kalbaryo an aantuson han katawhan tungod han iresponsable nga pagmina.”
Ini an mabug-at nga rason kun kay-ano nagpagawas hin “Open Letter” hi Padre Amadeo Alvero, Kura Paroko han Katoliko nga Singbahan ha MacArthur, Leyte kun diin iya igindig-on nga pasadhan na an minahan didto han nasabi nga munisipalidad.
An StrongBuild Mining Corporation in nagdudumara hin BlackSand/Ironsand Mining ha MacArthur ug nasasakop han operasyon an pira nga parte han mga bungto han Tolosa ngan Mayorga.
Dida han iya surat nga iginpublikar ha Facebook, nagsering hi Alvero nga ha atubangan han natabo nga pagbabaha ha pira nga parte han Luzon, naluhod hiya ngan nanginginyupo ha mga opisyales han gobyerno nga pasadhan an pagmina ha MacArthur, Leyte. Sumala ha iya, nakikimalooy hiya ha ngaran han katawhan nga karuyag maproteheran an kalibungan.
“Kun aton mapanalipdan an kalibungan kontra han kaguba hini, an kalibungan amo mismo an magproproteher han kinabuhi han tawo,” pahayag pa han Kura Paroko.
Maaram hi Alvero nga makuri kontrahon an dagko nga kompaniya han pagmina, pero may paglaum nga mauswag an iya protesta kun mabulig an mga opisyales han gobyerno han iya ginpapakigbisog.
An surat ni Alvero an iya ginpa-abot ha pamunuan han probinsya han Leyte, Congresista han Segundo Distrito, mga kaapi han Hunta Probinsyal, ug an alkalde han MacArthur.
Aminado an opisyal han Singbahan nga nakakatagamtam gad hin sweldo an mga nagtatrabaho ha minahan, pero ini in temporaryo la, kay katapos han operasyon deri na magagamitan hin pagtanom an apektado nga mga lugar tungod kay waray man rehabilitasyon nga natatabo.
Gintudlok ni Alvero an mga kahagnaan ha tulo nga barangay han bungto nga nagmamamara na ngan alagid-agid hin disyerto. Ini nga lugar in ginminahan ngan waray rehabilitasyon bisan kun iginlalarang ini han kasabutan ha butnga han DENR ngan kompaniya han pagmina.
Nagsering pa hi Alvero nga mayda na gihapon nagreklamo nga mga parupangisda ha Lake Bito nga nagkaada hin “fish kill” ngan posible nga an kemikal nga baya han pagmina an tumagas ngadto han lugar.
Igindugang pa ni Alvero nga suportado ini nga iya gi-os ni Arsobispo John Du han Palo, labot la han pagpaluyo han kadam-an nga mulopyo han bungto.
Hadton 2013, nagdumara na hira hin rally ngan ginpa-undang an pagmina hadto. Pero nahibalik na liwat ini, pahayag pa han Kura Paroko. Kadam-an nga mag-uuma in iginka-istorya hadto ni Arsobispo Du mahitungod hini nga isyu ngan nagsering an opisyal han Singbahan nga kaupod hiya han pagpanalipod han kalibungan.
Kun deri pamati-an an iya hangyo ha lokal nga mga opisyales, nagsering hi Alvero nga hi Presidente Duterte an sunod nga iya pagsusuratan. Kun waray liwat pitad nga hihimo-on an Pangulo, an sunod nga bubuhaton nira amo an pagpakalsada na liwat pinaagi han pag-rally.
Labot la han iya “open letter” hi Alvero in ginpaki-anhan liwat han iFM-RMN Tacloban yana nga adlaw kun diin iya pa gin-esplikar an kadugangan nga impormasyon mahitungod hini nga isyu. #
i
