Isumat.com/4:35PM,June 29, 2020
Tikang pa hadto nga mga panahon, pirmi iginpapahinumdom ha Kristyano Katolika nga pagtoo nga an selebrasyon han kapistahan in nakasentro ha pagpasalamat ha Makagarahum ngan Santos nga Patrono/Patrona. Pero ha paglabay han mga katu-igan, sugadsugad nga an garboso ngan engrande nga mga aktibidad gawas han singbahan amo lugod an natatagan hin dako nga atensyon han katawhan kontra han relihiyoso nga mga tradisyon.
Yana nga Hunyo 30, 2020, naanaw an mga festival, karisyuhan, konsyerto, mga li-aw libang, wala too nga irirgnom, sapin-sapin nga kirigta, ngan iba pa nga ginawi-an nga alagid-agid hin pamarayaw na ngan waray koneksyon han tinood nga rason kun kay-ano nagsasa-urog han fiesta.
Tungod han pandemya durot han COVID-19, an mga relihiyoso la nga aktibidad an paghihimo-on ngan mismo hi Tacloban City Mayor Alfred Romualdez an nagsering nga kinahanglan waray iba nga aktibidad nga magigin hinungdan nga magkakatitirok an katawhan basi makalikay han pagsarang han ginkakahadlukan nga kagaw.
Hi Romualdez in hul-os nga naghatag han syento porsyento nga suporta han City Government para han mga buruhaton han Singbahan kasumpay han kapistahan ni Santo Nino de Tacloban. Ini nga mga religious activities nga ginlalakipan hin caravan, fluvial procession ngan mga santos nga misa in limitado la an matambong.
Para han ika-131 nga pagtigaman han Sto Nino Fiesta, nagkaada na han siyam ka adlaw nga Misa Novenario nga natapos yana nga adlaw,Hunyo 29. Magkakamay-ada gihapon hin Vesper Mass alas 5 han kulop nga pangungunahan ni Bishop Filomeno Bactol ngan susundan hin motorcade/caravan kun diin igsusudoy an imahen han Mahal nga Patron ha bug-os nga syudad basi mabendisyunan an katawhan.
Buwas, ha adlaw han katungtungan, pagsasa-urugon an Misa Pontifical alas 9:30 han aga ug an mangunguna han misa amo hi Palo Archbishop John Du. Mayda gihapon misa pagka-alas 6 hit gab-i ug an celebrant amo hi Naval Bishop Rex Ramirez.
An nabatasanan nga fluvial procession in bubuhaton alas 2 han kulop didto ha Tacloban City Port ngan katapos hini bubuhaton naman an motorcade kun diin iglilibot han syudad an mga imahen nira “El Teniente”, El Capitan”, ngan “El Sargento.”
Tungod nga posible damo nga katawhan an matambong han mga misa ha Sto Nino Church, ginhimo nga extension han singbahan an bug-os nga Plaza Rizal basi didto omukupar an mga deboto ngan magpabilin an physical distancing. Istrikto gihapon nga igpapasunod an insakto nga pagsul-ot han face mask para han ma-atender han mga aktibidadis han singbahan.
An tema han kanan yana nga tuig selebrasyon amo ini: Steadfast Faith in Sr. Sto Nino: Our Source of Hope and Protection Amid Pandemic.”
Yana nga adlaw (Hunyo 29) gintigamnan han syudad han Ormoc an kapistahan nira San Pedro ngan San Pablo, ngan parehas han iba nga lugar, waray gihapon natabo nga karigudigo ngan mga karisyuhan labot la han mga aktibidad han Singbahan. # (KEVIN SIOSANA)
