Isumat.com/8:30AM, August 5, 2020
Temporaryo nga ginpasuspender han Borongan City-LGU an operasyon han Our Lady of Mercy College tungod han pakatalapas hin pira nga mga patakaran nga gin-implementar han National Inter-Agency Task Force (IATF) Against COVID-19.
An operasyon han eskwelahan sugad man an Business Permit in suspendido tobtob Agosto 31, 2020, subay han kamanduan ni Borongan City Mayor Jose Ivan Dayan Agda. Dida han pahayag han Borongan City Information Office, an nasabi nga aksyon in iginrekomendar han City Legal Office, City Health Office, ngan Business Licencing Office.
An Suspension Order an iginserbe nira City Legal Officer Atty Fernando Tanglao Jr ngan Executive Assistant Atty Alexis Devora ngadto han tagdumara han OLMC kakulop han aga.
Dida han kamanduan, nagawas nga nakasupak an eskwelahan han pagderi han face-to-face nga pag-eskwela. Naghimo hin klase an OLMC nga waray koordinasyon ha LGU ngan pagtugot tikang ha Commission on Higher Education. Gintugutan gihapon han OLMC nga deri magsul-ot hin face mask an mga magturutdo ngan estudyante.
Hinsabutan gihapon nga waray handwashing facility ngan disinfectant an eskwelahan; waray body temparature check; waray foot bath; ngan an mga estudyante waray medical certificates.
Aminado naman an OLMC nga waray hira makagsunod han mga patakaran han LGU ngan IATF. Nagdumara hin pagklase an OLMC tinikangan hadton Hulyo 20, 2020.
Labot la han nasabi nga mga bayolasyon han mga aludayday, usa nga opisyal han OLMC in tikang ha iba nga lugar ngan nag-kwarentina la hiya didto han eskwelahan bisan kun ginsagdunan hiya nga mag-istar la anay ha Isolation Unit han syudad.
Ini nga opisyal in naghangyo nga mabiyahe hiya tikadto ha Manila imbes nga mabalhin ha Isolation Unit pero ini in waray aprobari han LGU kay deri pa tapos an iya kwarentina ngan deri hiya makakasulod ha Manila kay iginpasunod man didto an Modified Enhanced Community Quarantine.
An OLMC in namumutang ha Brgy Locso-on ha Borongan City, Eastern Samar. #
