Isumat.com/9:12AM, August 5, 2020

Deri pa ngani nagmimiringaw an mga reklamo mahitungod han barrier ha motorsiklo, adi na liwat hin bag-o nga igsusul-ot han mga pasaheros han pampubliko nga sarakyan.

Tinikangan yana nga adlaw (Agosto 5), an ngatanan nga pasaheros han pampubliko nga sarakyan ha bug-os nga Pilipinas in kinahanglan magsul-ot hin face shield ngan face mask. Ini in agud magin doble an proteksyon kontra han makamaratay nga COVID-19.

Nagpahayag an LTO-Region 8 nga nagpagawas hin Memorandum Circular No. 2020-014 an Department of Transportation nagmamando han Mandatory Wearing of Face Shield and Face Mask han ngatanan nga pasaheros han pampubliko nga transportasyon.

Mayda penalidad an makakasupak hini nga kasugu-anan kay nakakasupak ini han health protocols. Nagsering an LTO nga Mil Pesos an multa hini.

An mga personales han LTO ngan mga Deputized PNP, ngan HPG personnel an magpapasunod hini nga patakaran.

Subay han panmaki-ana han Isumat.com, an presyo han face shield in tikang ha 35 pesos tobtob ha sobra usa ka gatos an kada usa.

Kadungan hini, igin-anunsyo han ahensya nga an mga plate number nga nagtatapos hin 6,7 ngan 8 in puede pa magpa-renew han rehistro tobtob Setyembre 30, 2020. #