Isumat.com/7:18AM, August 19, 2020
Hadton nag-agi nga pira ka bulan, haros ngatanan nga natatapnan han Covid-19 ha Eastern Visayas amo an mga LSI nga nanguli tikang ha iba nga parte han Pilipinas, pero han yana nga bulan han Agosto natatabunan na ini han mga lokal nga paglarab han ginkakahdlukan nga kagaw ngan kadam-an han mga kaso an deri na natutudlok kun diin an surok han virus.
Kakulop, Agosto 18, nagreport an DOH Regional Office hin bag-o nga 84 nga na-igo han kagaw. Dida hini nga numero, sobra 50 an matatawag nga local transmission tungod kay mga Health Workers ug an iba nga katawhan an natapnan han ira iginka-urusa ha balay o ginbabantayan nga pasyente.
An gidadamu-i an nahipatik nga natapnan kakulop amo an Villareal, Samar kun diin 22 ini katawo. Hira in mga iginka-urusa han mga naha-una nga pasyente tikang han bungto.
Dida han pakighimangraw kakulop han Isumat.com kan Mayor Marilou Latorre, nagpahayag hiya hin dako nga pagtoo nga an mga LSI nga waray koordinasyon ha LGU an rason han pagsibrang han virus ha ira bungto. Nabibido hi Latorre nga nakawang la an pira ka bulan nga pag-istrikto ngan pagpinanhatag hin relief ha mga bungtuhanon tungod han waray disiplina nga mga nanguli tikang ha iba nga lugar. Usa na nga pasyente han Covid nga residente han bungto an binawi-an hin kinabuhi.
Nagsakmomo naman hin kadugangan nga 15 nga kaso an Catbalogan City ngan hira in mga nagkatatapnan han mga naha-una nga nagpositibo han virus. Hapagkayana, sobra 40 an Active Cases didto han nasabi nga syudad.
Napulo naman an bag-o nga kaso han Tacloban City. An upat in mga nagkatatapnan nga waray travel history pero iginka-urusa hin mga Covid Patient, samtang an unom in waray pa impormasyon mahitungod ha ira.
Upat gihapon nga kaso hin local transmission an nahilista ha Alangalang, usa nga local transmission ha Tanauan, ngan mayda Frontliner nga natapnan ha Palo.
Didto naman ha Eastern Samar, lima nga Health Workers an bag-o nga nagkatatapnan. Ngatanan hira nagtatrabaho ha San Julian Rural Health Unit nga iginka-urusa hin pasyente nga nagpositibo han virus. An duha hini nga health workers in taga Borongan pero naka-destino ha San Julian.
Kasumpay hini, nagdeklarar hin Lockdown hi San Julian Mayor Dennis Estaron dida han iya munisipalidad. Ini in epektibo tikang yana nga adlaw tobtob Biernes, Agosto 21. Ini in agud magdumara hin hingpit nga contact tracing ngan disinfection ha bug-os nga bungto.
Iginmando ni Estaron ha mga mulopyo nga deri magkagawas ha ira mga panimalay samtang may lockdown. An puede la gumawas an importante hin duro an toyo ngan emergency nga sitwasyon. Tutugutan naman nga makasulod ha border han bungto an mga katawhan nga maagi la ha San Julian ngan tipakadto ha iba nga lugar.
Napulo naman nga mga LSI an bag-o nga mga pasyente ha Ormoc. Mga LSI gihapon tikang ha Cebu an 5 nga nahidugang ha Southern Leyte.
Dida pa gihapon han report han DOH kakulop, 75 an bag-o nga naka-recover sanglit umabot na 1,111 an nakatalwas dida han 1,765 nga natapnan. An mga Health Workers ha Sinirangan Bisayas nga nadarahigan han virus in umabot na 161, samtang siyam naman nga Covid Patients an nagkamamatay. #
