Isumat.com/8:30AM,April 30,2020
Viral yana ha social media in usa nga video kun diin nagpapakita hin karigumok ha usa nga barangay ha Palapag, Northern Samar. Gin-aaligar nga an kapitan han barangay in nagmalmal han iya pistola ha nawong hin usa nga babaye.
Subay han record han Palapag Police Office, hi Lito Orio, 42 anyos, kapitan han Brgy Binay, ngan usa nga residente ginkilala ngahi Michael Macallan in nagkaada hin argumento mahitungod han panlista han makakakarawat han SAP cash assistance dida han Abril 28.
Nagin mapaso an ira balyu-ay hin pulong ngan umuli hi kapitan ngan pagbalik hini ginkadto an balay ni Michael ug may dara na nga pusil dungan han pag-guli-at hin ” Pusilon ko ikaw, mga ka-_#%*?#*? kam, panmamatayon ta kam.”
Dida hini, an asawa ni Michael ngahi Hazel Joy in kadagmitan nga kumuha han iya cellphone ngan ginkuhaan na hin video an natatabo. Dumugang an kasina ni Orio han makakita nga may video camera na ug nag pruweba ini pag-agaw han cellphone. Hito nga takna nga ginrarabnot ni kapitan an cellphone, iya ginmalmalan han iya pistola hi Hazel ug naigo ini ha baba ngan nasamaran.
Hi kapitan in nahawiran han iba nga residente ngan bumalik ha iya balay. Hi Hazel in nagpadayon pag record han video ug iya nahingaranan hi Kagawad Julio Derilo nga testigo han insidente. An biktima in pumakadto ha Rural Health Unit basi magpatambal.
Kasumpay hini, hi Palapag PNP chief Lt. Neil Fernandez in nagpahayag nga ira na gin-iimbestigar an nasabi nga panhitabo ngan iya iginpatapod nga an kaangayan nga kaso in igsasalawad kun bastante an mga ebidensya. Iya gihapon iginpahinumdom nga kinahanglan waray malabaw han balaud bisan ano pa man an iya katungdanan.#
