(Image by foremansafety.supply.com)

Isumat.com/9:07AM,April 30, 2020

Mas nagin andam pa an DOH-Eastern Visayas ha pakigsurapo kontra COVID-19 dara han pag-abot han mga Personal Protective Equipment (PPE) ngan iba pa nga mga higamit kakulop nga adlaw.

An ahensya in nagpahayag nga dumangat ha ira an mga higamit sugad han surgical mask, N95 mask, cover-all suits ngan face shields. Ginpasalamatan han DOH an Office of Civil Defense ngan iba pa nga opisina nga nagburublig basi mahi-deliver ini nga mga higamit tikang ha Manila.

An nasabi nga mga higamit in pagbabatagbatagon ha duha nga DOH Hospitals han rehiyon nga amo an EVRMC ug an Schistosomias Hospital ha Palo. Tatagan gihapon an iba pa nga hospital labi na ha mga lugar nga may nag positibo ngan suspected cases han corona virus.

Samtang, dida naman han Martes, nag-turn over an DOH hin mga ambulansya ngadto hin pira nga mga Local Government Units ha Sinirangan Visayas. Dida han nasabi nga okasyon, natagan han mga ambulansya an Catarman, Calbayog, Santa Fe, Villaba ngan Tolosa.

Lakip ini han 34 nga ambulansya nga napalit han ahensya han una nga tuig kun diin nagkantidad ini tanan hin 85 milyones pesos.

An iba nga ambulansya in nakatalaan gihapon ighahatag ha mga LGU nga nakag-request hini ug gin-aprobaran subay han ira panginahanglan. #