Isumat.com/5:46AM, Pebrero 5, 2021
Ha deri maiha nga panahon, mapapadukwag an serbisyo-medikal para han mga Biliranon sugad man ha pira nga mga paghagrani nga bungto han Leyte tungod han tutukuron nga New Biliran Provincial Hospital (NBPH).
Malipayon nga iginpasamwak ni Biliran Governor Rogelio Espina nga yana nga tuig titikangan na an konstraksyon han bag-o nga hospital. An Biliran District Hospital in magigin New Biliran Provincial Hospital. Hapagkayana, an BDH in namumutang ha Brgy Sto Nino, Naval, samtang an bag-o nga hospital in tutukuron ha Brgy Larrazabal han mao gihapon nga munisipalidad.
Sumala kan Espina, an proyekto in nagkakantidad hin 400 Milyones pesos ngan gin-aprobaran na ini han DPWH ngan Budget Department. Titikangan an pagtrabaho yana nga tuig ngan ginlalauman matatapos hiton 2023.
Hapagkayana, an daan nga hospital in mayda la 75-capacity, pero an NBPH in magkakaada hin 130-bed capacity.
An Provincial Government han Biliran in magdudugang pa hin mga facilidadis sugad han Dialysis Center ngan iba pa. Ini in labot la han kadugangan nga mga personales nga magtitimangno han mga pasyente.
An gobyerno-provincial sugad man hi Biliran Congressman Gerry Boy Espina an naningkamot nga matangdu-an ini nga proyekto han National Government tungod han panginahanglan han mga Biliranon hin mas maupay nga facilidad basi deri na pumakadto pa ha iba nga lugar an mga pasyente.
Hapagkayana, damo pa nga mga pasyente tikang han probinsya in napakadto ha Ormoc, Tacloban ngan Cebu para han ira panginahanglan ha serbisyo ha panlawas.
An nasabi nga hospital in magseserbe ha mga Biliranon sugad man han mga katawhan tikang ha Calubian, San Isidro ngan Leyte, Leyte. #
