Isumat.com/10:02AM, Enero 4, 2021
Abri an Gobyerno Provincial han Leyte nga pagtukuran hin Ayala Mall an propyedad han probinsya ha Magsaysay Boulevard, Tacloban.
Ini an nagin kabatunan ni Leyte Governor Mic Petilla han pamaki-anhan hiya han iFM-RMN Tacloban mahitungod hini nga isyu kun diin antis pa an Pasko nagin himangrawon ini hin pira nga sektor labi na han mga negosyante.
Nagsering hi Petilla nga kun mayda man plano an negosyante nga pamilya Ayala hini nga panuyo, andam makig-istorya an iya pamunuan. An mga katunaan ha kahilab-an han Magsaysay Blvd tikang ha Balyu-an Park ngadto ha Tacloban Port Area in gintatag-iya han Provincial Government of Leyte.
Sumala pa han gobernador, ini nga isyu in puede matabo basta maklaro la an negosasyon labi na kay magdudurot ini hin kaupayan deri la ha Leyte kundi ha bug-os nga rehiyon. Puede ini nga proyekto pinaagi han Public-Private Partnership (PPP) o igbabaligya han Leyte an propyedad ha Ayala, dugang pa han amay han probinsya.
Pero ginklaro ni Petilla nga hasta ngada yana, waray pa makig-istorya ha iya an Ayala Group ngan mga sumat-sumat pala ini.
Igindig-on pa ni Petilla nga kun intresado ngan desidido hini nga plano an Ayala, kinahanglan ha Provincial Government of Leyte hira makigsabot ngan deri ha bisan hin-o o ano nga grupo kay klaro ha titulo nga an tag-iya han tuna amo an probinsya. #
