Isumat.com/4:30PM,July 9, 2020
Igin-anunsyo ni DILG Secretary Eduardo Ano nga aprubado na han COVID-19 National Task Force an backriding o pag-angkas ha motorsiklo, pero may mga kondisyones: Syahan, an asawa la o an live-in partner an puede umangkas; ngan ikaduha, kinahanglan may barrier o nakaka-ulang nga dibisyon ha butnga han drayber ngan backrider.
Ini daw nga diskarte in agud mahipatuman an physical/social distancing nga usa han mga paagi basi kalikyan an pakatapon o pagsarang han virus.
Sugadsugad nga pataraw-an o gin-imbento tikang ha iba nga planeta ini nga konsepto. Huna-hunaa nala, an mag-asawa o mag live-in in waray face mask ha balay nga nangangaon, nag-iistorya, nagdidirig ngan naglalabing-labing. Pero kun mabiyahe ha motor kinahanglan may dibisyon.
Ambot kun sobra hin kabaltok o kulang hin sentido komon an naghurma hini nga ideya. Ano an gamit han barrier ha motorsiklo kun nagbabalyu-ay hin laway an mag-partner ha sulod han balay?
Ano an gamit han barrier ha motor kun nagpapahungit-hungit an magti-ayon kun aadto hira ha balay?
Ano an gamit han barrier ha motor kun nagdudungan pagkarigos an mag-asawa ha balay?
Ano an gamit han barrier kun pirmi nagdidikit an mag-partner ha balay ngan pirmi magtam-is an ira kahimtang?
Ini nga barrier in puede pa gud magin kawsa hin disgrasya kay bangin dida kumapot an angkas imbes nga maupay unta nga adto hiya han hawak han drybaer nakapot. Kun deri maupay an kataod han barrier, bangin pa ini iglupad han hangin ngan madisgrasya an angkas.
Ini nga patakaran han gobyerno in magdudurot pa gud hin kadugangan nga gastos ngadto han mga nag-iimit-imit han ira budget labi na yana nga panahon han krisis ngan makuri an pagpakabuhi.
Amo ngani ini an rason kun kay-ano nga damo an naghangyo nga tugutan an pag-angkas kun miembro han pamilya basi makatirok hin kwarta kay mahal an pamasahe . An matatabo lugod yana, mapalit hin materyales o mabayad ha welding shop basi la maghimo han barrier nga waray pulos.
Para ha iyo…ano it iyo masesering hini?
