Isumat.com/7:49AM, Marso 6, 2021
Waray na-eskperiensyahan nga bisan ano nga deri maupay nga epekto ha iya panlawas hi EVRMC Chief of Hospital Dr. Salvador Evardone katapos han iya pagpabakuna han Covid Vaccine nga Sinovac.
Kakulop, Marso 5, banda alas 3 an oras, hi Evardone an ginturukan han Sinovac, ngan hiya an nahipatik nga opisyal nga gisasyahani nga tawo ha Region 8 nga naka-agom han bakuna. Hi EVRMC Chief Nurse Dolly Casio an nag-injection kan Evardone dida han pormal nga pagtikang han panmakuna han health personnel han rehiyon.
Pira ka minutos katapos han injection, nagpa-ki-ana an Isumat.com kan Evardone han iya inaabat, ug nagsering hiya nga baga-baga hin waray man la. An iya la gin-abat an pagsulod han dagum ha iya butkon.
Pagka alas 6:15 han aga, Marso 6, nagpaki-ana an iFM-RMN Tacloban kun ano na an iya kahimtang katapos hin sobra 15-oras tikang han pagbakuna ngan amo la gihapon an iya baton: “Waray ako gin-abat bisan ano nga side effect tobtob yana.”
Iginbuyagyag pa ni Evardone nga umabot hin 100 nga personales han EVRMC an nabakunahan dida han Marso 5 ngan subay han ira monitoring duha la ha ira an may gin-abat nga “mild symptoms” ug amo ini an dizzines o paglipong han ulo. Pero katapos la hin 15 minutos nawara an paglipong han duha ka tawo.
Tungod han pagpakita nira Evardone ngan iba pa nga opisyal han EVRMC nga nagpabakuna na hira, nagtikadamo an nag-interes nga magpabakuna na gihapon nga hadto nagruhaduha anay.
Hinungdan hini, nanawagan hi Evardone ha mga health workers nga deri mag-alang pagpabakuna labi na an waray mga commorbidities kay segurado nga waray side effects ngan waray maraot nga epekto ha lawas an bakuna.
Ginseguro gihapon han opisyal nga umagi ha insakto nga proseso an clinical trials han bakuna sanglit waray angay ikabaraka.
Iya gihapon ginsagdunan an mga health workers nga deri na magpili hin brand han bakuna, ngan kun ano an abilable, kinahanglan magpaturok na basi katagan hin proteksyon kontra han Covid labi na kay duro hira ka-expose ha mga pasyente.
An taga-EVRMC amo an syahan nga batch nga naturukan han bakuna katapos han pag-abot han sobra 7 Mil nga doses han bakuna kakulop, Marso 5. Magpapadayon an panmakuna ha masunod nga pira ka adlaw. An 2nd Dose han bakuna an igtuturok ha ira paghagos hin porlomenos upat ka semana.
Mayda gihapon bakuna nga igingahin para han mga personales han Schistosomiasis Hospital ha Palo ngan Divine Word Hospital ha Tacloban. #
