Isumat.com/8:54AM, Marso 1, 2021
Katapos hin maiha nga panahon nga lalaki an nagrerenda han pamunu-an han Integrated Bar of the Philippines-Leyte Chapter, babaye naman yana an magkakatin han lingkuranan komo presidente han hugpo.
Hi Atty Hasmin Cristy Avila-Bibar an napili nga bag-o nga pangulo han IBP-Leyte dida han gindumara nga election hadin Pebrero 27 ha Tacloban City kun diin gintambungan ngan ginbotosan hin harani 400 nga mga abogado ha probinsya han Leyte ug an mga syudad han Baybay, Ormoc ngan Tacloban.
Partikular nga nagin mapaso ngan mahugot an pag-eleher han pagka-pangulo kay tobtob han na-ikatarapos an inihapay waray nakakasegurado kun hin-o an magdadaog. Pero hi katapus-tapusan, hi Avila-Bibar an naka-angkon han posisyon kontra kan Atty Neil Sia ha botos nga 196-191.
An bag-o nga Presidente in nagserbe komo secretary han grupo han nag-agi nga duha ka tuig. Hiya an ginang-maybahay ni DILG Asst Director Darwin Bibar.
Tulo nga abogado an nagpa-isan-isan pagka Bise-Presidente ug hi Crispin Simuon Cercado an nakadaog.
Napili naman nga Secretary hi Kimberly Peque; Treasurer – Mary Agnes Sedanza-Pusay; Auditor – Ramon Pedroza; PIO- Aluino Ala; samtang an Board of Directors in pagkokomponeron nira Retired Judge Agerico Avila, Sharilee Gaspay-Mauro, Joseph Escalona, Caryl Villanoza-Avila, ngan Mark Stephen Reyes.
Subay han pahayag han IBP-Leyte, usa ini han election kun diin damo hin duro an nagpartisipar ug ha syahan nga higayon, gintugutan an on-line voting tungod na gihapon han Covid Health Restrictions.
An bag-o nga mga opsiyales in magseserbe hin duha ka tuig antis an election hiton Pebrero 2023.
An IBP in nahimugso hadton Dekada 70 ug ini an gintu-inan han Korte Suprema nga asosasyon han mga abogado ha bug-os nga nasud. Ngatanan nga nakakapasar han Bar Examination ngan nahipapatik an ngaran ha Roll of Attorneys han Korte Suprema in awtomatiko nga miembro han organisasyon.
Hapagakayana, sobra 40 Mil an aktibo nga mga miembro han IBP ha bug-os nga Pilipinas. An mga Chapters ha magkalainlain nga probinsya in naghimo gihapon han ira election hito nga petsa, Pebrero 27. #
