Isumat.com/6:32AM, September 01, 2020
Nagtikahilawig pa an pagpasunod han General Community Quarantine (GCQ) ha Tacloban City katapos la nga iglakip ni Presidente Rodrigo Duterte an syudad dida han mga lugar nga magpapabilin han nasabi nga klasipikasyon hin kwarentina.
Hi Duterte an nagpahayag nga an Metro Manila ngan Calabarzon Region, Bacolod ngan Tacloban in igpapailarum ha GCQ tobtob Setyembre 30, 2020. Waray maghatag hin rason an pangulo kun kay-ano nga mag-iiha pa an GCQ ha Tacloban.
Kun manunumduman, an Regional Inter-Agency Task Force in nagpa-ilarum han Eastern Visayas ha GCQ tobtob Setyembre 11, pero tungod hini nga kamanduan han Malacanang, tobtob pa ini katapusan han Setyembre. Hapagkayana, sobra na 400 an nagpositibo han Covid-19 dida han syudad ngan sobra 300 an Active Cases.
Upod han igindederi ha Tacloban an pagpalit, pagbaligya, pagdaradara ngan pag-inom hin makahurubog nga irimnon ha bisan diin nga lugar ngan bisan ano nga oras. Igindederi gihapon an pagkagawas ha balay han menor de edad ngan senior citizens.
Kun ha Tacloban dyeta ha alkohol an mga alsa-baso, iba naman an diskarte ha Ormoc City kay “Modified” an ira liquor ban. Subay han mando ni Mayor Richard Gomez, deri puede mag-tagay-tagay ha mga restobar sugad man ha Food Park, sari-sari stores ngan gawas han balay. Pero puede makapalit hin irimnon ngan ha sulod la han balay an pagtagay.
Puede gihapon ha Ormoc an pagdumara hin relihiyoso nga aktibidadis basta deri malapos hin 50% ha kapasidad han singbahan an matambong nga katawhan.
Gintutugutan gihapon ni Gomez an pinamilya nga katitirok sugad han kasal ngan birthday pero kinahanglan himoon hini ha sulod hin lisensyado nga establisemento, waray makahurubog nga irimnon, ngan mayda permit tikang ha City Health Office.
Igindederi naman ha Ormoc an mga concerts, pag-abri han sinehan, sporting events ngan mga asembliya ha mga barangay. An katawhan nga makadto ha magkalainlain nga opisina didto ha Ormoc in kinahanglan mayda QR Code Pass, face mask ngan face shield. #
