Isumat.com/1:23PM, August 31, 2020
Kinahanglan bag-uhon han mga hospital, laboratoryo, klinika ngan mga dialysis centers ha Tacloban an mga pamaagi ngan sistema ha ira mga facilidadis basi deri na magtikadamo pa an natatapnan han Covid-19 sumala kan Mayor Alfred Romualdez.
Iginbuyagyag ni Romualdez nga dida han gindudumara nga contact tracing han mga otoridad han syudad, kadam-an han natutudlok nga gintikangan han kagaw an mga Health Workers. Ginklaro han alkalde nga deri hiya nag-aaakusar nga mga Health Workers an kawsa han paglobo han positibo ha Tacloban, pero amo ini an sitwasyon o resulta dida han contact tracing nga ginhihimo.
Dida han nag-agi nga duha ka semana tigda nga nagtikahitaas an mga kaso ha Tacloban ngan ginlalakipan ini hin mga Health Personnel. Nalutaw ha contact tracing nga damo an Health Workers an nagkatatapnan ngan pag-uuli nira ha ira tagsatagsa nga balay nakakagsarang hira han kagaw. Iginsumat ni Romualdez nga damo an mga miembro han pamilya hin Health Workers an na-iigo han kagaw.
Hapagkayana, lapos na 400 an natapnan ha Tacloban ngan sobra 300 iton Active Cases. Sobra 20 nga mga barangay in aada ha Temporary Lockdown ngan tulo nga barangay kapitan an nag positibo.
Dako an paghipa-usa han City Mayor kun kay-ano nga nagakakatatapnan an Health Workers ha mga hospital ngan mga klinika, pero waray man natatapnan nga mga contact tracers ngan mga frontliners nga nakikig-urusa ha mga naabot nga LSI. Ini nga kahimtang in nagpapakita nga aada gud ha mga hospital ngan mga health facilities an problema. An proseso o sistema ha hospital an may problema sanglit damo an natatapnan nga nagtatrabaho didto.
Yana nga kulop, an City Government in makikighimangraw han nagdudumara hini nga mga health facilities agud masolbar ini nga problema. Naghahanagyo hi Romualdez ha mga hospital ngan klinika nga magin tangkod hira kun may problema ha hospital basi makabulig an City Government. Nagsering hiya nga may mga hospital nga deri nagsusumat kun hira hin-o an mga personales nga natatapnan sanglit deri nira na-aabisuhan an mga barangay officials kun diin nag-uukoy ini nga mga natapnan nga medical personnel.
Iginpasarig ni Romualdez nga deri nira igsusumat ha publiko an mga ngaran hini nga mga Health Personnel, kundi gagamiton la ini ha contact tracing. Kun deri magsumat an mga hospital ngan mga klinika kun hira- hin-o ini magtitikadako la an problema han Covid, sering pa han Mayor.
Sumala pa kan Romualdez nga deri nagtatangkod an iba nga hospital han ira problema kay nahadlok nga deri na mapakadto ha ira an mga pasyente ngan maiibanan an ira kita. Kun amo ini an matatabo, damo lugod nga pasyente an deri na magpapa kunsulta ngan magkakamagtay lugod.
Igindugang pa han opisyal nga deri puede mag lockdown an Tacloban kay deri akos han gobyerno an panhatag hin ayuda ha sobra 300 Mil nga residente han syudad. Magigin problema gihapon an ginatos-gatos nga pasyente nga tikang ha gawas han Tacloban kay deri hira magpapakasulod pagpatambal ngan pagpa kunsulta kun igpasara an bug-os nga syudad. #
