Isumat.com/9:20AM, June 17, 2020
Mayda problema han mga pamaagi o protocols nga ginpapasunod ha Eastern Visayas Regional Medical Center (EVRMC) ug ini in nagdudurot hin dako nga pagkabaraka ha publiko.
Ini an nagin reaksyon ni Tacloban City Mayor Alfred Romualdez katapos la mag positibo han COVID-19 in 18 nga medical personnel ha EVRMC kun diin 16 hini in residente han Tacloban. Nakaka-alarma ini nga panhitabo kay an na-alakbatan an mga personales nga amo unta an magtatambal han mga magsakit.
Nanawagan hi Romualdez nga manginlabot na an DOH-Central Office ngan imbestigaron an panhitabo ha EVRMC. Kagab-i, iginreport han DOH-Regional Office nga unom nga doktor, 7 nga nurses, duha nga nursing attendants, duha nga radio technicians ngan ambulance driver an natapnan han virus. Dara hini, temporaryo nga ginpasadhan an Emergency Department han hospital basi maghimo hin disinfection.
Aminado an city mayor nga nabibido hiya kay nanalinguha an City Government nga deri magsarang an kagaw ha Tacloban, pero dara hini nga damo nga nagpositibo ha EVRMC apektado an syudad kun diin namumutang an hospital. May pagtahap hi Romualdez nga may natatabo nga deri asya nga pagdumara han hospital.
Hi Romualdez in nagsering nga maniningkamot hiya nga igka-istorya hi DOH Secretary Francisco Duque basi imbestigaron ini nga panhitabo ha EVRMC. Napapa-usa hi Romualdez nga dako man unta an budget ngada han hospital pero damo nga mga personales han hospital an nagsumat nga kulang hin mga higamit sugad han Personal Protective Equipment.
Ginklaro han alkalde nga deri hiya makakagi-os han panhitabo ha EVRMC kay deri ini kanan City Government, an nagdudumara han hospital amo an DOH ug waray poder an City Government nga manginlabot han operasyon han hospital.
Dida hini nga insidente ha EVRMC, ginkakabarak-an nga mayda pa iba an posible natapnan kay an iba nga health workers in nag-uuli-ui man ha ira tagsatagsa nga panimalay.
Dara hini nga panhitabo ha EVRMC, apektado an bug-os nga rehiyon kay nag-uusaan la ini nga Tertiary Hospital ug an mga taga Region 8, labi na an mga kablas in napakadto ha EVRMC.
Sobra na 20 katawo an natapnan han virus ha Tacloban ngan usa pala an naka-recover. Ha bug-os nga Eastern Visayas 264 an kumpirmado nga nag positibo han virus ngan 36 an recoveries. # (KEVIN SIOSANA)
