Subay hiton kasaysayan hit kalibutan, nagawas iton pagigin produktibo ngan hilarum nga mga ideya kun panahon hin krisis. Ini nga mga ideya o estratehiya in nagigin dalan nga makahimo hin mga higamit nga dako an mahibubulig paghatag hin solusyon han mga problema sugad han igindudurot yana nga krisis han COVID-19.
An Biliran Province State University (BiPSU) kun diin an main campus in namumutang ha Naval, Biliran, in nakahimo hin ekipahe ngan pamaagi ha panuyo nga deri na unta magsarang an kagaw. Amo ini an ira Foot-Pedal Type Faucet nga iginta-od ha magkalain-lain nga lugar ha ira campus. An LGU-Naval upod han Naval Water District in nagtukod hin mga hand-washing area palibot han bungto basi maaghat an mga mulopyo nga pirmi manhunaw han kamot bisan aadto hira han gawas han balay. Usa man gud nga epiktibo nga pamaagi kontra han virus an pirmi panhunaw.
An BiPSU in nag level-up dida hini nga pitad kay an ira Engineering and Physical Development Office ha panguna ni Engr. Carlito Orais an nakahimo hin paagi nga imbes nga gagamiton an kamot pag-abri han gripo, tatamakan na la han tiil an ilarum nga parte han faucet pagpa-awas han tubig. Pinaagi hini, maiibanan an peligro han mga tawo kay ha kamot posible magkaada hin pagbalhin an kagaw. Resulta, deri na kamot an gagamiton pagpa-awas han gripo kundi an till nala.
Sumala kan University President Victor Canezo, dako an bulig hini basi deri magsarang an virus. Kasumpay hini, nagsering hi Canezo nga andam hira nga maghatag hin technical assistance ha LGU ngan iba pa nga komunidad basi mahimoan gihapon hin sugad hini nga gripo an iba nga lugar. Hiya in nanawagan nga makigsumpayan ha ira an LGU basi magkaada pa hin damo nga foot-pedal faucet an ira lugar.
Labot la hini nga proyekto, nakahimo gihapon an unibersidad hin mga intubation/aerosol boxes ngan iginhatag ini ha Biliran Provincial Hospital. Ini nga equipment in magagamit ha mga hospital kun nagdudumara hin endotracheal intubations. Nagsering hi Canezo nga ini nga intubation boxes in igpapanhatag gihapon han mga hospital denhi ha Rehiyon Otso nga nagkikinahanglan.
Nahimugso ini nga mga proyekto dara han inisyatibo ni Canezo ug an paningkamot ha teknikal nga aspeto nira Engr Vivencio Pelesco, Dean of School of Engineering; Engr Ramon Pitao, chairperson of Bachelor in Mechanical Engineering; ha pakipagsumpayan han departmanto ni Orais. #
(Posted 8:17 AM, April 1, 2020)
