Isumat.com/7:31AM, Enero 2, 2021
Pira ka oras antis an bag-o nga tuig binawi-an hin kinabuhi in tulo ka tawo ha magkalain nga panhitabo hin disgrasya ha kadalanan ngan panmusil ha Ormoc City ngan Calbayog City.
Hadton Disyembre 31, an nahidabi hin aksidente in usa nga pampasahero nga traysikol kun diin namatay an duha nga pasaheros ngan kritikal yana an kahimtang han drayber. Ginkilala an mga namatay nga hira Cyril Coyoca, 17 anyos ngan hi Rhian Denise Palad, 13 anyos. Hira in ngaduha nag-uukoy ha Brgy Ipil.
An drayber nga hi Frankie Cabaluna in aadto pa yana ha hospital ngan gintatambal. An mga otoridad in nagpapadayon han imbestigasyon hini nga panhitabo.
Samtang, an negosyante nga hi Anastacio Jackson Jr in pinusil ngan pinatay pasado alas 4 han kulop, Disyembre 31. ha sulod mismo han iya tindahan ha Brgy San Joaquin, Tinambacan District, Calbayog.
Hi Jackson in nagbabantay han iya tindahan han tigda la may umulpot nga lalaki nga nagpa-arak hin bala ngadto han biktima. Namatay hi Jakcson samtang gintatambal ha hospital.
Didto naman ha Balangkayan, Eastern Samar, nadara ha hospital in usa nga lalaki han maigo hiya hin holens nga ginhimo nga bala hin boga.
Sumala han report han Este News, an 23-anyos nga lalaki in gindara ha Eastern Samar Provincial Hospital ha Borongan City basi pagtambalon.
Ha Borongan City, unom nga kalalakin-an an nagkaada hin injuries han magbungu-ay an ira ginsasakyan nga mga motorsiklo ha Brgy Libuton hadton gab-i han Disyembre 31. Subay han notista han Este News, an usa nga motorsiklo in tikang ha Baybay ngan ti-uli na ngadto ha Brgy Balacdas an mga sakay hini. Iginkabungu-ay hira hin motorsiklo nga an mga sakay in taga Maydolong.
Tulo han mga biktima in menor de edad.
An PNP Regional Office in nagpasamwak nga nagin mamurayaw an bug-os nga Eastern Visayas dida han pagtigaman han New Year. Waray nahireport nga mga karamtan ha lawas durot hin mga paburuthon ngan pagpabuto hin pusil, pahayag pa han PNP. #
