Isumat.com/9:20AM, July 30 2020
Dara han waray pagkabudlay nga panlimbasog han militar ngan mga Local Government Units, umabot na ha 296 nga anay kaapi han New Peoples Army in nakapahimulos han mga kalungganayan ha ilarum han Enhanced Comprehensive Local Integration Program (E-CLIP).
Dida han report han Philippine Information Agency-8, an mga nakatagamtam han programa in ginlalakipan hin 47 nga miembro han NPA samtang an 249 in kaapi han Militia ng Bayan. Nagkakantidad hin 13.84 Milyones pesos an ayuda pinansyal nga igingahin para han nasabi nga rebel returnees. Ini nga aktibidad o pagproseso han mga benipesyo in natabo tikang Enero tobtob Hunyo 2020.
Ha probinsya han Leyte, 11.76 Milyones pesos an ginbukalsan para hin 33 nga miembro han NPA ngan 229 nga Militia ng Bayan. Ini nga salapi in para han pagpakabuhi, pagtindog hin balay ngan bayad han igintubyan nga armas.
170 Mil pesos naman an iginhatag para hin tulo nga nagsurender ha Eastern Samar. Ha lalawigan han Samar, 15 nga rebelde an nagbahinbahin han 856 Mil pesos nga ayuda pinansyal.
Iginpahayag pa han report nga bisan naatubang han pandemya an militar ngan mga tinaglawas han LGU ngan iba pa nga ahensya han gobyerno, nagpadayon an ira mga pitad ha pagkumbinser nga bumalik ha piyod han balaud an mga rebelde nga kumunista.
Labot la han ayuda pinansyal, an mga rebel returnees ha San Isidro, Leyte in nakakarawat hin food packs. Naabot ini hin 530 nga mga kaapi han pamilya han anay mga rebelde didto han nasabi nga lugar. #
