Isumat.com.8:21AM,May 22, 2020
Katapos hin sobra usa ka adlaw nga biyahe tikang ha Quezon City, nakabalik na ha Leyte an syahan nga grupo nga nakatagamtam han programa nga Balik-Probinsya, Balik Pag-asa han administrasyon ni Pangulo Duterte.
Pasado alas 9 an takna kagab-i han umabot ha Leyte Government Center ha Candahug, Palo, Leyte an 112 ka tawo sakay hin upat nga bus. Gintapo hira nira Leyte Governor Mic Petilla, mga tinaglawas han magkalainlain nga Local Government Units, mga opisyales han mga ahensya han gobyerno ug mga kaapi han media.
Kaupod gihapon han sumugat ha ira amo an mga frontliners tikang ha Department of Health nga nagdumara han disinfection.
Samtang ginhihimo an assesment ha ira, pinapanga-on hira han pangiklop. Kataliwan hini, ginkuhaan hira ngatanan hin swab samples nga igpapailarum ha confirmatory test. Pinasakay na hira han mga behikulo han tagsatagsa nga LGU ngan nakadangat na kagab-i ha ira mga lugar.
Deri la anay hira makaka-uli ha ira mga pamilya kay magkakaada pa han katorse ka adlaw nga kwarentina ha mga Community Isolation Unity han LGU samtang ginhuhulat an resulta han swab test.
Dida hini nga pagkabalik han mga tawo tikang ha Manila, pira nga LGUs in nagpabati hin kabaraka kasumpay han pondo nga gagastuson ha paghatag hin pakabuhi hini nga mga tawo. Sumala pa hin mga taga LGU nga waray la magpangaran, dako ini nga obligasyon han ira bungto labi na nga naibanan an pondo ha panhatag han relief goods. Ini in labot la han kataragman nga posible mayda makalusot nga nagdadara han corona virus ngan makatapon ha iba nga mulopyo han bungto.
Kun aton manunumduman, nagpagawas hin Executive Order hi Presidente Duterte kasumpay hini nga programa. Iya minanduan an usa nga konseho ha panguna ni Executive Secretary Salvador Medialdia nga maghimo hin guidelines para han programa nga dapat mahisubmiter ini nga guidelines ha sakob hin usa ka bulan.
Tobtob yana, waray pa guidelines pero gin-implmentar na ini nga programa. Panuyo hini nga maibanan an duro kadamo nga populasyon ha Metro Manila ngan iba pa nga dagko nga syudad. # (KEVIN SIOSANA)
