Isumat.com/8:45AM, July 21, 2020
Katapos han pira ka tuig nga pakigbisog, nagrarayhak yana an mga nurses tungod han namimintana nga paghitaas han ira sweldo.
Ini nga umento in para han mga nurses ha pampubliko nga mga hospital, lakip na gihapon an mga nurses nga nagtatrabaho ha mga Local Government Units ngan iba pa nga ahensya han gobyerno.
Hi Alfon Guiller Daga, Governor han Philippine Nurses Association (PNA)-Eastern Visayas, in nagpabati han iya tim-os nga pagpasalamat ngan hul-os nga kalipayan tungod nga magigin kamatuoran na an sobra na hin dekada nga ira hingyap han salary increase.
Ha deri pala maiha, nagpalusad hin desisyon an Korte Suprema nagmamando ha gobyerno nga ig-implementar an probisyon han Republica Acta 9173 o Philippine Nursing Act of 2002 para han umento han sweldo. Iginlalarang han balaud nga an Salary Grade 11 (22k) han bag-o nga nurse in magigin Salary Grade 15 (32k). Dara hini, mag-uumento gihapon an iba nga salary levels han mas maiha na nga mga nagseserbisyo.
Dara han desisyon han Korte Suprema, an Department of Budget and Management in nagpagawas hin Memorandum Circular hadin Hulyo 17 para hini nga panuyu-anan.
Hi Daga in nagsumat nga importante ini nga kada-ugan para han ira sektor kay maiha na hin duro an panahon nga ira ginhulat para matuman an ira hingyap. Nagdumara pa an ira grupo hin mga protesta para la pamati-an han mga natutungdan nga ahensya han gobyerno an ira araba.
Kasumpay hini, nagpasalamat hi Daga ha ngatanan nga nurses sugad man han pamunuan han Eastern Visayas Regional Medical Center han ira kooperasyon ngan suporta dida han ira panlimbasog.Hi Daga in nagklaro nga bisan kun naghimo hira hin mga protesta hadin nakalabay nga mga katu-igan, waray nira pagpasibay-i an ira mga trabaho ngan obligasyon hadto han mga pasyente.
Hi Daga in nagtatrabaho ha EVRMC tikang pa hadton 2016. #
