Isumat.com/4:09AM, August 18, 2020
Mayda na natatabo nga Community Transmission han Covid-19 ha Catbalogan City, Samar sumala han alkalde han syudad Dexter Uy.
Ha deri pala maiha, iginpahayag ni Mayor Uy nga an DOH Regional Offfice in nagdeklarar han Commmunity Transmission han virus ha Catbalogan dara han sunod-sunod nga natapnan han kagaw nga waray travel history nga mulopyo. Iginreport gihapon han DOH kagab-i nga mayda 24 katawo ha Catbalogan an natapnan han Covid ug hira ngatanan in nagtatrabaho ha Samar Provincial Hospital kun diin kadam-an han mga pasyente han corona virus ha Catbalogan ngan paghagrani nga bungto in naka-confine.
Ini nga 24 nga kaso iin lakip dida han bag-o nga 95 nga Positive Cases ha bug-os nga rehiyon nga igin-anunsyo kagab-i han DOH.
Sumala kan Uy, kun hiya la an masusunod, karuyag niya magpatuman hin Total Lockdown ha iya nasasakupan basi la kabalabgan an pagsarang han kagaw, pero makuri niya ini himoon kay mayda man mga kamanduan an National Government nga deri la bastabasta an pagdeklarar hin total lockdown.
Hinungdan hini, magkakamay-ada hin hiruhimangraw an mga miembro han lokal nga Inter-Agency Task Force basi magmugna hin kabag-uhan nga mga pitad pagsurapo han Covid. Nagsering hi Uy nga magigin mas istrikto an mga patakaran ha Catbalogan nga kinahanglan pagsundon han publiko.
Nabibido an amay han syudad nga tobtob yana damo la gihapon nga Catbaloganon an deri nagtutuman han mga health protocols sugad han physical distancing ngan pagsul-ot han face mask ha luyo han pirmi pagpahinumdom nga sundon an nasabi nga mga patakaran. Mahugot nga nag-warning hi Uy nga tungod hini nga kahimtang, deri hiya mag-aalang pagpatuman han balaud ha iya lugar.
Utro hiya nga nanawagan ha mga taga Catbalogan nga seryusohon an sitwasyon yana ngan deri hikalimtan an pagdisiplina ha tagsatagsa. Iya pa gin-awhag an katawhan nga mag-ampo ha Makagarahum sugad man kanda Senyor San Bartolome ngan Senyor San Roque. An syudad in magsasa-urog han kapistahan ni San Bartolome sobra usa ka semana tikang yana ngan ira na gintikangan an siyam ka adlaw nga Novenario.
Hapagkayana, mayda 51 nga Active Cases an Catbalogan upod na an mga bag-o nga nagkatatapnan. Mayda liwat 29 nga naka-recover han mga naha-una nga nagpositibo han virus. #
