Isumat.com/7:32AM, August 18, 2020

Siyam na nga pasyente han Covid-19 ha Eastern Visayas an tumalikod ha kadayunan. Kakulop, iginreport han Philippine Information Agency (PIA-8) nga nagpahayag an DOH Regional Office han tulo nga bag-o nga nagkamamatay.

Ini nga mga binawi-an han kinabuhi amo an masunod: 33-anyos nga taga Abuyog, Leyte; 66-anyos nga taga-San Julian, Eastern Samar; ngan 88-anyos nga residente han Villareal, Samar. An taga San Julian in maiha na nga may sakit ha kidney pero waray travel history. Waray gihapon travel history pero mayda iba nga sakit an taga Villareal. Waray pa maghatag hin detalye an LGU-Abuyog kasumpay han namatay ha ira bungto.

An DOH in nagdudumara pa yana hin hingpit nga pagsusi basi matudlok kun Covid-19 o iba nga sakit an hinungdan han ira kamatay. Hira nga tulo in kumpirmado nga nagpositibo han virus pira na ka adlaw an nakalabay.

Samtang, nahipatik naman kakulop (Agosto 17) an gidadamu-i nga natapnan han virus dida han kada adlaw nga report han DOH. Nag-anunsyo an ahensya nga 95 an bag-o nga nadarahigan han makamaratay nga kagaw, sanglit umabot na ha 1,680 an nagpositibo ha rehiyon. 1,036 naman an naka-recover (62%).

Lakip han bag-o nga nagpositibo an mga nagtatrabaho ha Rural Health Units ngan hospital.

Nagpahayag an Samar Provincial Hospital nga 24 han ira personales an natapnan kakulop. Dara hini, waray la anay pangunsulta ngan pag-admit hin mga magsakit didto hini nga hospital. An ira la aatenderan an mga sitwasyon nga emegency. Magdudumara hira hin disinfection sugad man contact tracing.

Ha Tacloban City, lima nga health workers ngan usa nga empleyado ha City Hall an upod dida han 10 nga bag-o nga natapnan nga Taclobanon.

Nagtikahaluag gihapon an Local Transmission ha Villareal, Samar kun diin 17 an bag-o nga pasyente. Hira ngatanan in natapnan han naha-una nga mga nagkaada han kagaw.

Mayda gihapon nagkatatapnan nga waray travel history tikang ha Calbayog, Paranas, San Jorge, Zumarraga, ngan Daram ha probinsya han Samar.

Mayda liwat tag-usa nga kaso an Llorente ngan San Julian, Eastern Samar. Hira in bag-o nga nagpositibo pero waray travel history. An taga Llorente in may sakit ha kidney, samtang an usa nag-aantos hin Down Syndrome. Hira ngaduha in naka-confine ha EVRMC.

An Tanauan, Leyte in may bag-o nga siyam nga kaso kun diin an unom ha ira in mga close contacts hin nagpositibo han virus hanhadi.

An duha nga bag-o nga pasyente ha Southern Leyte in mga LSI tikang ha Cebu.

Na-obserbaran nga ini an syahan nga higayon nga darudamo an nahi-report nga Local Transmission kun igtatanding ha mga LSI. Hunungdan hini, namimintana yana an peligro nga mayda nagkakatatapnan ha mga hospital ngan nagkakatatapnan nga waray travel history. #