Isumat.com/7:45AM, July 13, 2020

Nagpapadayon an pagtikahitaas han nakakatalwas tikang han infection han COVID-19 ha Eastern Visayas.

Dida han report han DOH Regional Office han Hulyo 12, umabot na 579 dida han 646 nga nag positibo an naka-recover. Ini in 89% nga recovery rate ha aton rehiyon.

Iginreport gihapon han DOH nga 44 an naka-recover kakulop, salit hapagkayana naabot nala ha 64 an Active Cases. Nagpapabilin naman nga 3 nga pasyente an binawi-an han kinabuhi tungod han virus.

Waray gihapon iginreport kakulop nga bag-o nga kaso kay waray ginproseso nga swab samples an Eastern Visayas Regional COVID Testing Center. An Divine Word Hospital Laboratory in nagpagawas hin mga resulta pero an pito nga positibo in deri bag-o nga natapnan kundi mga re-swab han mga nagkatatapnan hanhadi.

Dida han mga nagpositibo, 424 an mga Locally Stranded Individuals (Hatid Probinsya), 52 an OFWs, 3 an kanan Balik-Probinsya, ug an iba kanan Local/Community Transmission.

An edad nga 20-29 anyos an may gidadamu-i nga natapnan kun diin umabot ini hin 252, samtang 165 an natapnan ha age bracket nga 30-39 anyos.

93 porsyento an waray ginpapakita nga sintomas han virus, sobra 6 porsyento an Mild Cases ngan waray mag 1 porsyento an Severe Cases.

Ha atubangan hini, igindig-on han DOH nga deri angay tumagya an publiko ngan igpadayon an pagsunod han minimum health protocol sugad han insakto nga pagsul-ot han face mask, social distancing, ngan pirmi panhunaw han kamot. #