Isumat.com/4:23AM, December 5, 2020
Nakarahibot na an magkalainlain nga mga nasud, grupo, organisasyon ha bug-os nga kalibutan basi maka-angkat han bakuna kontra han Covid-19, ngan deri mapa-urhi an Probinsya han Leyte.
Kakulop, Disyembre 4, ginka-urusuhan han mga kaapi han Provincial Taske Force on Covid-19 nga an gobyerno han lalawigan in mapalit han nasabi nga bakuna.
Hi Gobernador Mic Petilla in nagmando ha Provincial Budget Office nga mag-gahin hin pondo para hini nga panuyu-anan. Ginklaro naman ni Petilla nga hihimoon ini han probinsya ha takna nga aprobaran na han Food and Drug Administration an pag-gamit han bakuna.
Kadungan hini, iginmando gihapon han Provincial Task Force an pagderi han pangoroling ngan mga katitirok yana nga panahon han pasko ha bug-os nga lalawigan.
Ginbabanabana nga ha kabutgnga-an sunod nga tuig magtitikang na an panmakuna han katawhan denhi ha Pilipinas ngan mahagos ini tobtob 2025, sumala han National Inter-Agency Task Force.
Pira nga nasud in magtitikang na han ira panmakuna yana nga bulan.
Samtang, haros 9 Mil na katawo ha Eastern Visayas an natapnan han Covid tobtob han Disyembre 4, 2020. Umabot na ini hin 8,949 an Total Cases han rehiyon ngan 8,267 (92%) an naka-recover.
Iginreport pa gihapon han DOH Regional Office nga 95 na an Covid Patients ha Sinirangan Bisayas an namatay ngan mayda sobra kinyentos an Active Cases yana. #
