Isumat.com/7:27AM, August 7, 2020
Natapnan ha hospital an bag-o nga pasyente han COVID-19 nga residente han Lawaan, Eastern Samar. Ini an igindig-on han LGU-Lawaan han igpahayag han DOH-Regional Office an 61 nga bag-o nga kaso ha Region 8 kun diin lakip ini nga taga-Lawaan.
Nagsumat an LGU-Lawaan nga tikang ha katapusan nga adlaw han Hulyo, naka-admit na ini nga babaye ha EVRMC kun diin mayda niya iginka-usa nga nagpositibo han virus dida han hospital. Waray gihapon travel history ha gawas han rehiyon ini nga pasyente. An nasabi nga babaye in taga Brgy Bolusao, pahayag pa han LGU. Gindudumara naman yana an kadugangan nga contact tracing basi matudlok an iba nga tawo nga posible iginka-urusa hini nga bag-o nga pasyente.
Dida han mga bag-o nga kaso kakulop (Agosto 6), ngatanan mga Locally Stranded Individuals tikang ha gawas han rehiyon an nagkatatapnan labot la han babaye nga taga-Lawaan ngan lalaki nga Health Personnel nga nag-uukoy ha Catbalogan City.
Adi an lista han mga bungto ngan kun pira ka tawo an mga bag-o nga nagkatatapnan : (Samar Province) Villareal-1, Tarangnan-6, Catbalogan-9, Daram-7, Motiong-1, ngan Calbiga-2.
(Northern Samar) Lavezares-1, Catarman-1, Rosario-1, Gamay-1, Las Navas-1, ngan Mapanas-1.
(Eastern Samar) Lawaan-1, Llorente-1, Arteche-1, Gen McArthur-2.
(Southern Leyte) Maasin-5, Tomas Oppus-1, Macrohon-2.
(Leyte) Javier-6, Calubian-1, Hindang-1, Palo-1, Kananga-4, Baybay City-2, ngan Burauen-1.
Umabot na ha 1144 an nagpositibo ngan 774 (67%) an naka-recover tikang han infection han virus ha Sinirangan Bisayas. Mayda naman 398 nga Active Cases hapagkayana ngan upat na katawo an namatay tungod han Covid-19. #
