(Photo by Juvimar Lira)

Isumat.com/8:03AM, August 7, 2020

Gin-iimbestigar na yana han mga natutungdan nga mga ahensya han gobyerno kun tikang diin an mga parte hin eroplano nga natad-an han mga mulopyo ha kabaybayunan han Mercedes, E. Samar.

An mga personales tikang ha Civil Aviation Authority of the Philippines (CAAP), Philippine Drug Enforcement Agency (PDEA) ngan Philippine National Police (PNP) in pumakadto kakulop ha Mercedes basi manginano hini nga insidente.

Hadin Agosto 4, nakit-an hin pira nga residente ha Anuron Beach didto han nasabi nga bungto an mga parte hin eroplano.

Duro an paghipa-usa han mga taga Mercedes kun kay-ano nga nagkaada man hin plane debris didto han nasabi nga lugar. Waray man nahisumat nga may natabo nga aksidente hin eroplano harani han bungto.

An municipalidad han Mercedes in namumutang ha Sur nga dapit han Eastern Samar ngan naatubang ha kadagatan han Pacifico. #