Isumat.com/3:25PM, May 7, 2020
Tinikangan buwas (Mayo 8, 2020) magkaka-abot na ha Maasin City, Southern Leyte an mga nanguli nga OFWs tikang ha iba nga nasud. Syahan nga maabot buwas in upat nga OFWs.
Kasumpay hini, hul-os an pangandaman han City Government ha panguna ni Mayor Nacional Mercado han mga facilidadis ngan proseso nga igpapasunod para han mga OFWs basi makaseguro nga deri magdudurot hin problema labi na gud an mahitungod han corona virus.
An LGU-Maasin in nagtukod na hin Quarantine Facility ngan Isolation Units para hini nga panuyu-anan. Kaupod hini nga nag-andam amo an City Health Office, City Administrator, City Engineering Office ngan Philippine Red Cross-Southern Leyte.
Naghimo hin mga family tents ha CICL Building ha Brgy Combado nga amo an magseserbe nga decontamination ngan disinfection area. An usa nga tent in gagamiton para han disinfection han OFWs, samtang an ikaduha nga tent in para han decontamination han medical personnel.
An mga Quarantine Area in makaka-akomodar hin tag pito ka tawo kun diin an kada kwarto in ginhimo subay han mga aludayday han Department of Health.
An mga OFWs nga maabot in deretso mapakadto ha Quarantine Facility ngan kukuhaan hin swab samples. Samtang nagpapamulat han resulta, temporaryo hira mag-uukoy ha quarantine facility. Ha takna nga may magpakita hin sintomas hin trangkaso, igbabalhin ini nga tawo ngadto han Isolation Unit. Kun mag negatibo an resulta, deri na maghuhulat han 14-dias nga kwarentina, puede na umuli ha iya pamilya. Pero kun magin positibo an resulta, an pasyente in igbabalhin ha EVRMC-Magsaysay(Tacloban) para han pagtambal.
Ginsasagdunan naman han City Government an mga residente han syudad nga deri mabaraka ngan magin kalmante la kay antis pa umabot ha Maasin ini nga mga OFWs nagpa-ilarum na hira han Rapid Anti-Body Test ngan negatibo an resulta. Pag-abot liwat ha Maasin, maagi pa hira han mandatory quarantine nga igin-implementar han DOH ngan para na gihapon han katalwasan han mga Maasinhon. # (KEVIN SIOSANA)
