Damo hin duro it mga istoryahon kaparte han mga pamatasan ngan kun ano an aada ha kasing-kasing han kada tawo labi na ha takna hin krisis sugad han natatabo yana nga COVID-19 pandemic. Ngatanan nga aktibidad han tawo in apektado, pero maano pa man kabug-at an kahimtang nagpapabilin an pagserbisyo ha igkasi tawo, labaw han ngatanan.
Hi Stephen Mark Ida, usa nga Taclobanon, makarit nga basketball coach ngan usa nga nurse, in makokonsiderar nga usa han mga frontliners nga namumutang yana ha peligro an kahimtang han panlawas ug kinabuhi dara han iya propesyon. Hiya in staff nurse ngan PhilHealth Coordinator hin usa nga private hospital ha Tacloban. Sugad han iba nga medical workers, nagtutuman hiya yana han responsibilidad ha pagtambal ngan umayuda ha mga magsinakitnon nga posible maglakip hin mga tawo nga nagdadara han ginkakahadlukan nga virus.
Dida han siyam ka tuig nga pagigin nurse, hi Ida in waray gud makahunahuna nga makaka-eksperiensya hiya hin sugad hini nga ka-grabe nga paglarab hin makamaratay nga sakit. Pero sering niya nga nagin andam na an iya kalugaringon tikang pa hadto nga an pagserbe ha igkasi tawo an prayoridad bisan ano pa man an imo propesyon ngan bokasyon.
Hadton Hulyo 2018, hi Steph upod an iya pamilya in lumakat ngadto ha Vietnam komo kaparte han MIssio Ad Gentis, usa nga misyon basi igpasamwak an Maupay nga Sumat han Ginoo didto hini nga nasud. Dida han pagpasarang han Ebanghelyo, ini an nagin dalan han iya kinabuhi nga magin magturutdo ha basketbol. Antis pa lumakat ha Vietnam, higugma-on na niya ini nga oyag.
Komo liaw-libang ha Vietnam, namiling hiya hin basketball court ngan didto nagtikang an iya pagkaada hin koneksyon han mga nagdudumara han basketball program ha Vietnam. Nag-apply hiya komo Logistics Personnel han Sports Skills Academy (SSA) ha Saigon nga amo an multi-sports Developmental Academy. Ginkarawat hiya ug an iya trabaho amo an tinatawag nga Do-It-All-Guy. Nabulig han pagdara han mga gamit, paragpasa han bola han mga players, ngan iba pa nga obligasyon nga kaparte han training.
Tungod han iya gugma han oyag, nanlimbasog hiya nga mapadukwag an kina-adman hangtod nga nagin Assistant ngan nagin Head Coach na hiya ha SSA. Dida hini nga organisasyon, iya na-angkon in hilarom nga kina-adman tikang hin de-kalibre nga mga American coaches sugad kan Kevin Yurkus, ngan mga players ha NBA nga nagpa-angbit han ira talento ha mga Vietnamese.
Samtang nakadto pa hi Steph ha Vietnam, iginkasumpayan na niya hi Coach Noli Cabibihan nga amo an nagdudumara han Tacloban Active Basketball Center Inc (TABCI) ngan nagsabot na hira nga magkakaaada hin oportunidad hi Steph pagbalik niya ha Pilipinas ug natuman ini han umuli hiya hadton Abril 2019.
Pira ka bulan nga naghimo hin mga basketball clinics hi Ida denhi ha Tacloban ngan paghagrani nga mga lugar ngan iya iginpakita an iya dedikasyon ha iya bokasyon komo coach. An mga bag-o nga istilo ngan estratehiya nga iya nakuha tikang han mga banggiitan nga maestro ha Vietnam an iya iginpa-angbit upod an kinasingkasing nga pagtutdo.
Pero waray niya talikdi an iya pagigin health worker, kay dida han Hunyo 2019, bumalik hiya ha pagtuman han iya pagigin nurse. Hi Ida in nadestino ha Guiuan, Eastern Samar komo usa nga community nurse han Department of Health. Didto ha Guiuan, naka-eksperiensya hiya han pag-atiman han mga pasyente han dengue nga naglarab ha aton rehiyon han nag-agi nga tuig.
Han iya libre nga mga oras, nagpadayon an iya paghimo hin mga basketball clinics ngan pag-coach hin pribado ngan municipal teams ha Eastern Samar tobtob nga natapos an iya unom ka bulan nga kontrata ha DOH.
Upod han iya pamilya, bumalik na liwat hiya nganhi ha Tacloban ngan nagpadayon an iya pagigin magturutdo ha basketball, ngan waray pag-iha nakarawat nga nurse han pribado nga hospital. Hini nga mga panahon, ginbahin-bahin ni Ida an iya oras ha hospital, basketball ngan pamilya. Labot la han iya pagigin coach, tumukdaw gihapon hiya komo tournament manager han National Basketball Training Center (NBTC) Tacloban qualifying tournament. Ug dida han pagtampalo han corona virus ha aton nasud, tigda la nga na-utod an aktibidadis ni Steph kasumpay han basketball ug an iya oras yana in aadto ha hospital ug ha iya pamilya.
Han waray pa an COVID-19 crisis, damo na nga mga grupo, eskwelahan, ngan mga pribado nga kompaniya an nagpahayag han ira pagtagusya han kapas ngan dedikasyon ni Ida ha basketball, ngani han yana unta nga summer vacation, damo an nakalinya nga mga oportunidad ha iya para han pagpalambo han kina-adman han oyag. Nagdurot ini hin kasubo ha iya kay temporaryo nga umukoy an iya karera ha basketball coaching.
Ha atubangan hini nga iya pagdiskansyo ha basketball, nakatutok liwat hiya han iya trabaho komo frontliner ha pagsurapo han corona virus, ngan bisan kun namimintana an peligro dida hini nga sitwasyon, waray pagruhaduha nga ginhihimo ni Steph an iya responsibilidad.
Sering pa man niya, nagtubo hiya hin pamilya ngan kahimtang nga uunahon gud pirmi an pagserbe ha katawhan. Sanglit, dida han iya ginsusulsog nga dalan komo misyonaryo, basketball coach ngan pagigin medical worker iya igin-aalay an bug-os niya nga huna-huna ngan kasingkasing.
Hi Nurse-Coach Steph in aanhi yana ha Tacloban upod han iya ginang-maybahay ngan tulo nga anak. An iya mga kag-anak in ngaduha mga doctor, hi iya Mama in aada ha pribado nga sector samtang hi iya Papa in konektado ha DOH. #
(Posted 6:50 PM, April 12, 2020)
