Mahugot nga igindiwara han Department of Health an mga nagkagawas nga iru-istorya ha social media nga ginpa-ukoy han ira departamento an pag-ihap han mga nagkakamagtay dara han corona virus.
Dida hin usa nga opisyal nga pahayag nga iginpagawas han DOH, ira pinanhimuwa an mga hurobhurob nga usa daw nga hospital ha Manila an gin-aalegar nga minandu-an nga deri na mag-ihap han mga namamatay. Ini nga alegasyon in syahan nga nahipublikar dida han Instagram post ni Mr. Arnold Clavio, pahayag pa han DOH.
Nagsering an DOH nga nakig-istorya na hira kan Clavio, ngan nagdudumara na an ahensya hin imbestigasyon kasumpay hini nga alegasyon, ngan ira iginpatapod nga maghahatag hin update ha kadagmitan nga panahon kasumpay hini nga isyu.
Nagklaro an departamento han panlawas nga waray nira ginpapalusad nga mando pag-undang han pag-ihap han mga COVID 19 deaths ngadto hin bisan ano nga hospital. Ngani, ira lugod ginmandu-an an ngatanan nga hospital ngan health centers nga igreport an bisan ano nga kunsultasyon, admission ngan status han mga pasyente nga may kalabutan han corona virus.
Dida han Instagram post han kilalado nga broadcast journalist, nagsering hiya nga may naghatag ha iya hin impormasyon nga dida hin usa nga hospital ha Manila nahuyatang ngan nagsasarang nala an mga patay nga lawas ngan kada adlaw napulo ka tawo an namamatay. Kagab-i gintanggal na ni Clavio ini nga iya post.
Dara hini, utro nag-awhag an DOH ha publiko nga maghirot ngan seguraduhon nga tinood ngan beripikado an mga impormasyon antis ini igpasarang labi na ha social media. #
(Posted 6:21 AM, April 12, 2020)
