Iginpasamwak han DOH-Regional Office nga negatibo ngatanan ha corona virus an ika-pito nga batch han mga samples tikang han mga Persons Under investigation (PUI) tikang ha Eastern Visayas. Ini nga mga samples in tikang hin 28 nga mga PUI ug subay han laboraatory tests tikang ha Vicente Sotto Memorial Medical Center ha Cebu, ngatanan negatibo han virus.
An nasabi nga mga samples an iginpadara ha Cebu pinaagi han Philippine Coast Guard hadton Abril 9, 2020.
Labot la hini, an ikaduha nga swab sample han pasyente nga taga Calbayog City in negatibo na gihapon, sanglit kay duha na ka beses nga nag negatibo hiya, papagawson na hiya ha hospital, pero kinahanglan igpa-ilarum pa hiya hin mahugot nga 14-dias nga kwarentina.
Dara hini, kun ma-discharge na ha hospital an ikaduha nga COVID positive ha Region 8, duha na la ka tawo nga positibo han virus an magpapabilin ha hospital pahayag pa han DOH. Amo ini hira an mga taga Tarangnan, Samar nga gintoto-ohan nga natapnan han lalaki nga taga Calbayog. Ini nga duha tawo in nagpapakita hin maupay nga panlawas, pahayag pa han ahensya.
Igindugang pa han DOH nga nagpadara hira kakulop, Abril 10, 2020 han ikawalo nga batch han samples ngadto ha Cebu kun diin tikang ini hin walo ka tawo nga PUI. #
(Posted 7:27 PM, April 11, 2020)
