Isumat.com/7:33AM, Enero 19, 2021
Kun deri madidiskarel ini nga plano, magkakaada hin moderno nga Fishport ha Salcedo, Eastern Samar ngan magigin dalan ini nga makagtukod hin pabrika para han mga canned ngan bottled fish products.
Ini an iginsumat ni Norberto Berida, Regional Director han Bureau Of Fisheries and Aquatic Resources (BFAR) ha interview ha iFM-RMN Tacloban kakulop, Enero 18, 2021.
Nagsering hi Berida nga hadin 2020, nagka-urusa an DA-Regional Office, BFAR, DTI ug an opisina han An Waray Partylist nga magmugna hini nga plano kun diin igpapailarum ini han One-Eastern Visayas nga proyekto.
Dida hini nga proyekto, an usa nga lugar o munisipalidad han rehiyon in magkakaada hin usa nga produkto ug amo na unta ini an tuna processing para han Salcedo. Igindugang pa ni Berida nga posible ma-aprobaran na ini yana nga 2021 ngan ha gilayon titikangan an paghimo han fishport.
Gin-esplikar pa han opisyal nga kun tangdu-an an proyekto, mahagos hin tulo ka tuig an paghimo han seaport. Kun magkaada na hini nga facilidad, magdudurot ini hin pakabuhi hin damo nga katawhan ha Salcedo sugad man ha probinsya han Eastern Samar.
Magigin dalan gihapon ini basi magtukod hin mga industriya didto han lugar nga maghihimo han canned fish o processed bottled fish.
Hapagkayana, an dagko ngan maupay nga kalidad nga tuna in gin-aangkat tikang hito nga parte han Eastern Samar ngan gindadara ha General Santos City kun diin damo an manufacturing company han isda. #
