Isumat.com/ July 19, 2020
Mahugot nga pinanhimuwa ni Helenita Batiancela, ginang-maybahay ni Calubian, Leyte Mayor Marciano Batiancela Jr, an nahireport nga iya gintarhog an resort owner ngahi Ella Kramer ug an mga empleyado hini ngan nagsugo hiya nga gub-on an kudal han resort.
Dida han reklamo ni Batiancela ha Calubian PNP Station hadton Hulyo 17, iya igin-asoy nga an iya helper nga hi Ronnie Rances an nagsumat ha iya nga mayda mga tawo nga nagruruba han kudal han propyedad han pamilya Batiancela ug an nagsugo panruba amo hi Kramer.
Ini nga reklamo ni Mrs Batiancela in tarihas han naha-una nga iginsalawad nga complaint-affidavit ni Kramer. Hi Kramer, nga tag-iya han Lotus Resort nga namumutang didto han bungto in nag-alegar nga hi Batiancela upod an iya mga tauhan an nagruba han kudal han resort. Nag-akusar pa hi Kramer nga gintarhog pa ni Batiancela an iya umangkon nga may matatabo kun mag-inapi-api han isyu.
Pero an panig ni Batiancela in nagsering nga an kampo ni Kramer an nag guguba han kudal han propyedad han ira pamilya.
Subay han impormasyon nga nahikay han Isumat.com. an pamilya Batiancela in nakapalit han lote nga gintatag-iyahan ni Fe Lumapak Sickles, bugto ni Kramer. Hinungdan hini, magsapit an lote nira Batiancela ngan Kramer.
Nagsering an mga paryente ni Batiancela, hi Kramer in maiha na nga nagsisinamok tungod kay sugad sugad nga deri hiya na-abuyon nga napalit han pamilya Batiancela an tuna han iya bugto nga sapit han iya resort. Igin-alegar pa han mga paryente ni Batiancela nga haros kada adlaw nagsisinamok hi Kramer ngan nagsusugo ini hin mga menor de edad pangguba han propyedad ni Batiancela basi deri makagbaton ha balaud kay menor de edad man.
An Lotus Beach Resort an 23 anyos na an operasyon ha Calubian ngan gintatag-iyahan han byuda ngahi Kramer nga naka-asawa hin taga Netherlands.
Suspendido an ira operasyon dara han natatabo nga pandemya han covid 19.
An mister ni Helenita nga hi Marciano in nakadaog dida han nag-agi nga election ug nalingkod komo first-termer nga alkalde han Calubian. #
