Deri na maiihap an mando ni Tacloban City Mayor Alfred Romauldez nga magsul-ot gud hin face mask ngan kinahanglan an tama nga pagsul-ot hini kun magawas han balay yana nga panahon han COVID-19 pandemic. An konseho han Tacloban nagpasa gihapon hin resulosyon kasumpay hini. Upod gihapon han kamanduan an pagderi han pagsigarilyo ha pampubliko nga lugar.
Na-obserbaran nga damo an pasaway hini nga mga mulopyo…pero an makuri kun mismo an mga nagbabantay ha mga quarantine posts ngan barangay control point an deri nasunod hini.
Dida han litrato ha igbaw, makikita an duha nga bantay han aragi-an tipagawas ha Brgy 23, Burgos St. Nakuha ini nga litrato hadton Abril 18, Sabado nga adlaw. Maupay an ira istorya ngaduha…ug an ira face mask, aada ha sulang ngan deri ha nawong.
Pananglitan may umagi nga tawo ha tungod hini nga mga bantay ug ito nga tawo nagdadara na han kagaw ngan tigda la humatsing o mag-ubo ha ira atubangan, dako an peligro nga makakahisnok han kagaw ini nga mga bantay. Pastilan….kun matapnan, madalagan ha hospital…utro na liwat nga magpapabug-at han problema.
Ano gud mga Taclobanon? Mapa disiplina ba kita???
(Ini nga mga litrato iginhatag hin mga Concerned Citizens ha Isumat.com)
