Ginbabanabana nga maabot yana o buwas nga adlaw an resulta han confirmatory tests han pira ka tawo nga iginka-urusa han babaye nga taga Burauen, Leyte nga nagpositibo han corona virus.
Nagpahayag an DOH-Region 8 nga ira ginkuhaan hin samples in tulo ka tawo nga gintudlok nga close contacts han pasyente ngan an ira samples an igpapailarum han laboratory testing. Hinsabutan nga dida han Rapid Anti-body Test, positibo an resulta hini nga tulo ka tawo, pero subay hiton patakaran han DOH, kinahanglan pa han confirmatory test basi makonsiderar nga COVID Positive in usa nga tawo.
Dara kay adto pa man ha Cebu ginhihimo an confirmatory test, maghuhulat pa an DOH han resulta hini, pero dako an posibilidad nga magawas an resulta yana o buwas nga adlaw, pahayag pa han ahensya.
Samtang, mayda naman 12 ka tawo ha Tanauan, Leyte an iginpa-ilarum hin home quarantine kay dida han contact tracing nga ginhimo han mga otoridad, ini nga mga tawo an iginka-istorya o iginka-urusa han taga Burauen nga pasyente.
Sumala han pahayag ni Tanauan Mayor Pel Tecson, dida hini nga 12 ka tawo, lima ha ira in nagpakita hin mild symptoms salit naghangyo an alkalde ha DOH nga kadagmitan kuhaan hin samples ini nga mga tawo basi mahibaro-an an resulta.
Kadungan hini, nanawagan hi Tecson ha publiko nga maghulat anay han opisyal nga mga pahayag tikang ha LGU ngan DOH antis magpasarang hin deri beripikado nga mga impormasyon labi na ha social media. #
(Posted 8:15 AM, April 20, 2020)
