Isumat.com/5:34PM, August 22, 2020
Tinikaingan dida hiton Lunes, Agosto 24, utro nga igpapasunod ha syudad han Tacloban an General Community Quarantine sumala han pahayag ni City Mayor Alfred Romualdez yana nga kulop.
Nagsering hi Romualdez nga nagpadangat na hiya hin kumonikasyon ha Regional Inter-Agency Task Force nga igbabalik ha GCQ an syudad tikang ha Modified GCQ. Ini in agud kabalabgan an nagtitikadamo nga kaso han Covid-19 dida han syudad. An GCQ in epektibo tikang Agosto 24 tobtob Setyembre 8, 2020.
Kasumpay hini, utro magigin istrikto ha pagpasulod han mga mulopyo ha Tacloban kun diin kinahanglan mayda mga medical certificate, travel authority, valid ID card ngan QR Code an magkakasulod ha Tacloban.
Mahugot gihapon nga igdederi an mga pagkatitirok sugad han mga party, selebrasyoon hin pista ngan iba pa. Magpapadayon an pagdumara hin relihiyoso nga aktibidadis ha mga singbahan pero tobtob la hin napulo ka tawo an puede magtambong.
Yana nga adlaw gin-implementar na an liquor ban ha bug-os nga syudad ug tobtob gihapon ini Setyembre 8. An mga bars ngan mga establisemento nga nagseserbe hin makahurubog nga irimnon in temporaryo nga uundangon an operasyon.
Sasadhan gihapon an mga gym sugad man waray sports activities nga mayda physical contact dida hini nga panahon. Igindederi pagsinudoysudoy ha gawas an mga tawo nga nag-eedad hin 21 tipa-ubos ngan 60-anyos tipa-igbaw.
Dida han pahayag ni Romualdez, nagtotoo hiya nga usa han mga rason han tigda nga paglobo han mga kaso hin Covid amo an mga pagkariritok dida ha selebrasyon hin mga okasyon, sanglit kinahanglan likyan anay ini.
Nagtotoo gihapon hiya nga may mga mulopyo tikang ha iba nga lugar han rehiyon an nagdara ngan nakapanapon ha mga residente han Tacloban.
Umabot na ha 175 an mga Taclobanon nga nagkatatapnan ngan haros usa ka gatos an Active Cases hapagkayana. #
