Isumat.com/7:35AM, August 1, 2020
16 an nahidugang nga kaso han COVID-19 ha Eastern Visayas subay han report han DOH Regional Office kakulop (Hulyo 31). Dida han mga bag-o nga nagpositibo 15 an mga Locally Stranded Individuals ngan usa katawo nga nagin dako yana nga paki-ana kun diin hiya katapni han kagaw.
Amo ini an pasyente nga taga Brgy Maslog, Lawaan, Eastern Samar. Sumala han pahayag han LGU, ini nga tawo in umabot ha Lawaan tikang ha iba nga nasud hadton Marso ngan iginpa-ilarum han 14ka adlaw nga kwarentina. Nagin maupay an iya panlawas tikang han iya pag-abot. Dida han Hulyo 29, pumakadto hin pribado nga hospital ini nga tawo basi magpa-swab test kay kinahanglan an resulta han iya pagbiyahe kay magawas na liwat hiya han Pilipinas. Kakulop, iginreport han DOH nga positibo hiya han virus subay han confirmatory test ha Divine Word Hospital.
Kadagmitan hiya nga igin-akomodar ha Isolation Facility han bungto, upod na gihapon an upat ka tawo nga close contact niya. An iya mga sulod-balay an ginsagdunan gihapon nga mag-isolate. An LGU in nagdudumara yana hin contact tracing.
Ini nga nag positibo ha Lawaan an ika-upat nga kaso han COVID-19 dida han probinsya.
Tulo nga pasyente an nahidugang ha Maasin City ug hira in mga LSI tikang ha Manila. Mga LSI gihapon an tag-duha nga kaso ha Anahawan ngan San Juan. Samtang tag-usa naman an nagpositibo ha San Francisco ngan Pintuyan.
Ha Probinsya han Leyte, mayda tag-usa nga natapnan an Palo ngan Hindang, samtang duha naman an pasyente ha Tabango. Hira ngatanan in mga LSI.
An Pinabacdao, Samar in may bag-o nga kaso ngan LSI gihapon ini.
920 na katawo an nagkatatapnan ha bug-os nga rehiyon ngan 664 (72%) an nakatalwas. Hapagkayana, 253 an active cases han COVID ha Region 8. #
