Isumat.com/9:57AM,April 25, 2020
Sobra na beinte nga doktor an nagbuhis han ira kinabuhi ha pagsupil han corona virus ha Pilipinas. Ngan sobra hin 700 nga mga doktor ngan medical workers an natapnan na hini nga kagaw. Haros usa na ka gatos nga kapulisan an nag positibo han virus.
May mga pribado nga indibiduwal ngan mga grupo nga nagmamalahimo hin bisan ano nga paagi basi la makabulig han nagkikinahanglan bisan pa man kun nabubutang ha peligro an ira kinabuhi ngan pakabuhi. Ini hira amo an matutudlok naton nga mga bayani hini nga panahon han paghimakuri tungod han COVID-19.
Pero kita ngatanan in puede makabulig, bisan deri kita riko, bisan ordinaryo la kita nga magpakarabuhi ngan bisan ngani waray kita pakabuhi. Deri kinahanglan nga magin bayani kita, an importante makabulig kita ha aton talagudti nga paagi….ngan ini nga mga pitad in puede makadugtong han kinabuhi han aton igkasi tawo.
Pira na ka semana an nakalabay, an EVRMC Blood Bank in nanawagan para han mga katawhan nga boluntaryo mag donar hin dugo. Tungod han iginpatuman nga kwarentina, dako hin duro an pagkulang han reserba nga dugo dida han hospital nga amo an dinadalaganan han bug-os nga Rehiyon Otso ngan damo hini nga mga pasyente an nagkikinahanglan hin dugo.
Tungod han kwarentina, pipira-pira nala an walk-in donors ngan nasuspender an mga blood donation projects hin damo nga grupo. Waray gad naghihingyap nga magkaada hin sitwasyon nga magkikinahanglan hin dugo, pero kun may matabo, ano man an ighahatag nga dugo ngada han pasyente kun waray naka reserba.
Dida hini nga panawagan han EVRMC Blood Bank, nahinumdom ako nga tikang pa han na-eskwela ako han kolehiyo tobtob nga nagserbisyo ako ha gobyerno, pira na ka beses nga nag donar ako hin dugo. Dida ini hin mga okasyon ha eskwelahan ngan mga anibersaryo hin opisina, ug pira liwat ka beses nga ginhangyo ako hin iba nga tawo nga mag donar hin dugo para hin mga dengue patients.
Nag desisyon ako nga mahatag ako utro hin dugo labi na yana nga kulang an reserba. Hadin Biernes, Abril 24, katapos han akon radio program ha iFM-RMN Tacloban, dumeretso ako ha EVRMC, nagpa ilarum ako hin mahugot nga screening ngan salamat sa Diyos nga waray problema an akon panlawas ngan nagin kwalipikado ako.
Sobra la hin usa ka oras an proseso tikang han screening tobtob nga nakuhaan ako hin porlomenos 400ml nga dugo. Nagin hapsay ngan matulanoy an proseso dara han mga eksperto ha hospital ha panguna ni Roland Gorgonia, an supervisor han blood bank.
Waray ko gin-abat nga malain ha lawas ngan amo gihapon ini an akon eksperiensya han sobra na kinse ka beses nga nag donar ako hadto. Nagpasalamat an staff ha akon, pero ha akon huna-huna, deri ako angay pasalamatan kay obligasyon ko ini nga makabulig ha iba bisan kun deri ko makikilal-an kun hin-o an makakatagamtam han akon dugo. Ug ini in bubuhaton ko pa utro tobtob nga akos pa hit akon panlawas.
Nagruhaduha ako pagsurat hini nga artikulo kay tungod ini ha akon, pero may nagduduso ha akon nga igsumat ko ini ha publiko, bangin manla mayda ko ma kumbinser nga buhaton gihapon ini.
Ginsasaludohan ko an mga blood donors nga nagsakripisyo han ira kalugaringon ha panuyo nga makadugtong han kinabuhi han iba. Sering paman han usa nga kanta ha singbahan “Waray hin-o man an nabubuhi para la ha iya, ngatanan kita may katungdanan ha tagsatagsa.”
Kun ha imo pagkita, mapasar ka paghatag hin dugo, ayaw pag ruhaduha sangkay !
Para hin mga paki-ana…aadi an contact numbers han EVRMC BLood Bank: 09369143123 ngan 09365203920. #
