Isumat.com/2:30PM,April 26, 2020
Nakatalaan kuhaan hin swab samples in 16 ka tawo ha Tanauan, Leyte nga natudlok nga iginka-istorya o iginka-urusa han bag-o nga COVID-19 Positive case nga taga Burauen, Leyte.
Sumala han pahayag han LGU-Tanauan, kadagmitan hira naghimo hin contact tracing han mga tawo ha ira bungto nga posible iginkahibalag han 25-anyos nga babaye nga amo an gibabag-uhi nga nag positibo han virus ha Rehiyon Otso. Nag-request na an LGU ha DOH para kuhaan hin samples ini nga 16 ka tawo basi mahipadara ha Cebu para han confirmatory test.
Hapagkayana, ini nga mga tawo in iginpa-ilarum na hin istrikto nga Home Isolation lakip han mga miembro han ira tagsatagsa pamilya. Kun aton manunumduman, igin-anunsyo han DOH-Region 8 hadin Biernes an gibabag-uhi nga COVID Positive(Patient # 7) ug tikang hiya ha Burauen nga kaupod ha balay han COVID Patient # 5. An bungto han Tanauan in porlomenos 20 kilometros la an distansya ngadto ha Burauen.
Samtang, ginbabanabana nga ha ano man nga oras yana nga adlaw o buwas (Abril 27) maabot na an resulta han Batch # 12 han swab samples tikang ha Eastern Visayas nga ginpa ilarum han laboratory test ha Cebu. Ginkokomponer ini hin 133 nga samples sanglit amo ini an gidadamu-i nga samples ha ngatanan nga batches han swab nga ginpadara ha Vicente Sotto Memorial Medical Center.
Kadam-an hini nga samples in nagtitikang ha Tarangnan, Samar kun diin tulo na ka tawo an nag positibo han corona virus. Upod gihapon denhi an mga samples tikang han mga Suspected Cases ha magkalainlain nga lugar han Sinirangan Visayas. #
