Isumat.com/4:15PM, June 13, 2020
Kinahanglan imbestigaron an tinood nga pangilal-an han tawo nga nag positibo han COVID-19 nga residente han Almeria, Biliran. Ini an nagin pahayag ni Biliran Governor Rogelio Espina dara han impormasyon nga iya nahikay nga deri residente han bungto ini nga lalaki.
Kagab-i, iginreport han DOH Regional Office an syahan nga kaso han corona virus ha Almeria komo usa nga na-stranded nga residente han bungto didto ha Manila.
Hi Espina in nagdig-on nga subay han impormasyon, ini nga tawo in taga Mahaplag, Leyte ngan kun amo ini an kamatuoran, kinahanglan makigsumpayan ngadto han natutungdan nga LGU basi igbalhin ngadto an pasyente.
Nagpapaki-ana yana an gobernador kun hin-o an naningkamot nga maka-aro ini nga tawo hin certipikasyon nga residente hiya han Brgy Salangi, Almeria. Sering pa ni Espina, ini nga aksyon in nagpapakita la nga waray labot han katalwasan han mga Biliran kun hin-o man an nagpapaluyo han pagmani-obra han mga dokumento.
Kasumpay hini, hi Espina in nanawagan ha mga barangay kapitan han iya lalawigan nga seguraduhon gud nga residente han ira lugar an nagkakabalik nga mga indibiduwal ngan deri mga kasangkayan han tinood nga mga residente. An probinsya in nadepender ha desisyon han mga barangay officials hini nga isyu, sanglit kinahanglan gud nga maghirot kay grabe an epekto hini nga pandemya, pahayag pa han gobernador.
Ini nga insidente ha Almeria in angay imbestigaron basi kabalabgan an pag-isyu hin deri tinood nga mga sertipikasyon tikang han mga barangay officials, sering pa ni Espina. An mga personal nga koneksyon ngan interes in angay la anay igpadaplin yana nga panahon han krisis ha panlawas ngan sundon kun ano man an iginlalarang han balaud, dugang pa han amay han probinsya.
Kun mapamatud-an nga deri taga Almeria ini nga Positive Case, magpapabilin nga usa pala katawo an natapnan han virus didto han probinsya nga amo an taga bungto han Naval nga naka-kwarentina tobtob yana ngan positibo la gihapon an resulta han iya repeat swab testing. # (KEVIN SIOSANA)
