Isumat.com/8:07AM, August 10, 2020
Malipayon nga igin-anunsyo han DOH Regional Office nga 17 nga pasyente han COVID-19 an naka-recover kakulop (Agosto 9).
Tungod hini, umabot na ha 837 an nakatalwas tikang han virus dida han 1265 nga nagpositibo (66%). Waray naman iginpasamwak nga bag-o nga natapnan han kagaw kakulop.
Iginreport gihapon han DOH nga hapagkayana, 424 an ginbabantayan nga Active Cases ngan upat na katawo an namatay tungod han COVID-19. Dida han mga nagkatatapnan, 111 an mga health personnel.
Kadungan hini, iginpasamwak han Tacloban City Health Office nga natapnan hin usa nga Locally Stranded Individual tikang ha Manila an usa han iya mga close contacts. An LSI in usa nga lalaki nga mayda mild symptom ug gintotoohan nga iya natapnan an 43-anyos nga babaye nga iya iginka-usa.
Kasumpay hini, an City Health Office in naghihimo hin contact tracing hini nga kaso. Hapagkayana, walo pa an Active Cases ha Tacloban dida han 70 nga natapnan han kagaw.
Ha luyo nga bahin, gin-iimbestigar han mga otoridad han panlawas kun diin ngan pau-nan-o natapnan an 60-anyos nga babaye nga taga Tarangnan, Samar. Sumala kan Mayor Arnel Tan, deri man LSI ini nga babaye sanglit dako nga paki-ana kun ano nga natapnan hiya.
Nagsering pa hi Tan nga maiha na nga naka-confine ha EVRMC an pasyente tungod kay asthmatic ngan nagkaada na hadto hin tuberkulusis. Dara hini, gindudumara yana an contact tracing basi maseguro kun didto ba ha Tarangan nakapurot han kagaw an babaye o didto ha hospital.
Iginmando na ni Tan ha mga residente han Brgy Bonga nga kun mahiihimo deri la anay magkinagawas ha ira kabablayan ngan doblehon pa an paghirot kontra han virus. #
