Isumat.com/8:10AM,June 25, 2020
Umabot na ha 452 katawo ha Eastern Visayas an natapnan han COVID-19. Kakulop (Hunyo 24), may nahidugang nga 17 nga pasyente han corona virus, subay han gibabag-uhi nga laboratory results nga ginpagawas han EVRTC ngan DWH Testing Centers.
Dida hini nga mga bag-o nga kaso, unom an taga Palo, Leyte ngan tanan hira mga Locally Stranded Individuals (LSI) tikang ha Cebu City. An Tolosa, Leyte in nadugangan hin usa nga nagpositibo ug hiya in tikang liwat ha Cebu.
An munisipalidad han St Bernard, Southern Leyte in nagrehistro han syahan nira nga kaso pinaagi hin 37-anyos nga babaye nga umabot tikang ha Manila hadton Hunyo 14 sakay hin pribado nga behikulo. An iya mga kaupod in ginhuhulat pa an resulta han swab test.
Upat nga Positive Cases an nahipatilk ha Zumarraga, Samar ug ini an ira syahan nga mga kaso. Waray pa maghatag hin detalye an LGU, pero ira na iginpahayag nga han una nga semana, mayda nira ginkuha nga mga LSI tikang ha Catbalogan.
Didto ha Caibiran, Biliran may nahidugang nga usa nga kaso. Babaye ini nga tikang ha Manila ngan umabot ha ira bungto hadton Hunyo 12 upod in upat ka tawo sakay hin ginpakyaw nga van. Dida han iya mga urupod han byahe, usa an negatibo, samtang an tulo in ginpapamulat pa an laboratory result. Deretso hira ha Community Isolation Area tikang han ira pag-abot.
Ha Northern Samar naman, may duha nga bag-o nga kaso an Lavezares. Hira in mga LSI tikang ha Valenzuela City. An taga San Isidro nga bag-o nga natapnan in LSI gihapon tikang ha Manila nga iginkasakay han byahe ha barko han naha-una nga positibo ha ira bungto. An LGU-San Roque in nagkaada han ira syahan nga kaso nga LSI liwat tikang ha Manila.
Dida han mga negatibo an resulta kakulop, 23 an mga empleyado han EVRMC ngan 55 an mga residente han Tacloban.
Ha luyo nga bahin, iginbuyagyag han DOH-Central Office nga namimintana an peligro nga magin “hot spots” han COVID-19 in pira nga lugar denhi ha Region 8. Hi DOH Undersecretary Rosario Vergiere in nagsumat nga an mga probinsya han Leyte, Southern Leyte ngan Samar in posible magin hot spots dara han tigda nga pagtikadamo han Positive Cases.
Hapagkayana, an mga hot spots ha Pilipinas amo an Quezon City, pira nga syudad ha Metro Manila ug an Cebu City.
Pero iya ginklaro nga an DOH in maghihimo han kaangayan nga pitad basi deri ini matabo. Kadungan hini, hira DILG Secretary ngan National Task Force Chief Carlito Galvez in nanginano kakulop han sitwasyon ha aton rehiyon. Ira ginpahayag nga suportado nira an hangyo han mga lideres han rehiyon nga suspenderon la anay an pagpa-uli han mga LSI ngan OFW tikang Hulyo 1 tobtob Hulyo 15. Pero ini nga isyu in ira pa paghihimangrawan pagbalik nira ha Manila.
Nagdul-ong gihapon hin 8000 nga Personal Protective Equipment an mga opisyal han Task Force para hin unom nga lalawigan han Region 8.
Usa han gintutudlok nga rason han tigda nga pagsaka han mga kaso han COVID ha Reghion 8 amo an sunod-sunod nga pagka-uli han mga LSI ngan mga OFWs.
Hapagkayana, 39 pala nga pasyente ha Sinirangan Bisayas an igindeklarar han DOH nga fully-recovered. (KEVIN SIOSANA)
