Isumat.com/3:02PM,June 25, 2020

Napamatud-an han hukmanan nga nakasala hin kaso nga pagpatay hi Abraham Elpedez, anay Mayor han Balangkayan, Eastern Samar. Ini in kasumpay han pagpataya kan Eastern Samar RTC Judge Celso Lorenzo hadton Nobyembre 1, 1999.

Iginpalusad han RTC-Borongan an desisyon kontra kan Elpedez yana nga adlaw (Hunyo 25). An akusado in nasirutan hin reclusion perpetua o kapresuhan ha bug-os nga kinabuhi ngan deri hiya makakatagamtam hin parole.

Hadton Nobyembre 1, 1999 hi Lorenzo in pinusil samtang nakadto hiya ha sementeryo ha Brgy Balud han gunman nga hi Obet Rapanot/Roberto Caspe alias Largo. Naigo ha nawong an biktima nga nagin kawsa han dayon niya kamatay. Nagserbe naman nga back-up han pagpatay hi Lucimo Guardo.

Subay han record han kaso, hi Rapanot in taga Brgy Cabay, Balangkayan, samtang hi Guardo in taga San Mateo, Borongan City. Samtang ginbibista an kaso, hira Rapanot ngan Guardo in tumalikod ha kadayunan.

Naprobaran han korte nga hi Elpedez an utok o mastermind han krimen ngan iya ginsaaran hin premyo nga salapi hira Largo ngan Lucimo para patayon an huwes. Hinsabutan gihapon nga deri lisensyado nga kalibre .45 nga pistola an gingamit han pagpatay.

Hi Elpedez in presente dida han korte kanina han aga han igpalusad an desisyon ni Eastern Samar RTC Branch 1 Judge Elvie Lim. Waray pa pahayag tikang han kampo ni Elpedez kun ira ig-aapilar an kaso o magsasampa hin motion for reconsideration.

Tobtob han ginsusurat ini nga notisya, liimitado pa an impormasyon nga nahikay han Isumat.com, ngan waray pa makuha an motibo nga natudlok han korte nga rason basi igpapatay ni Elpedez hi Lorenzo. # (KEVIN SIOSANA)